2023-ൽ ഏറ്റവും കൂടുതൽ വിറ്റഴിക്കപ്പെടുന്ന കാറായി മാറി മാരുതി സുസുക്കി സ്വിഫ്റ്റ്. വാഹനത്തിന് മൊത്തം വിൽപ്പന 2,03,469 യൂണിറ്റുകൾ ലഭിച്ചു. 2022ൽ 1,76,424 യൂണിറ്റുകൾ വിറ്റ സ്ഥാനത്താണിത്. ഇതനുസരിച്ച് 15 ശതമാനം വാർഷിക വിൽപ്പന വളർച്ച ലഭിച്ചു. സ്വിഫ്റ്റിന് പിന്നാലെ മാരുതി സുസുക്കിയുടെ വാഗൺആർ, ബലേനോ, ബ്രെസ എന്നിവ യഥാക്രമം 2,01,301 യൂണിറ്റ്, 1,93,989 യൂണിറ്റ്, 1,70,588 യൂണിറ്റ് വിൽപ്പന നേടി രണ്ടും മൂന്നും നാലും സ്ഥാനങ്ങൾ നേടി. 2023-ൽ ഇന്ത്യയിൽ ഏറ്റവും കൂടുതൽ വിറ്റഴിക്കപ്പെട്ട അഞ്ച് കാറുകൾ
മോഡൽ വിൽപ്പന യൂണിറ്റ്
മാരുതി സ്വിഫ്റ്റ് 2,03,469
മാരുതി വാഗൺആർ 2,01,301
മാരുതി ബലേനോ 1,93,989
മാരുതി ബ്രെസ്സ 1,70,588
ടാറ്റ നെക്സോൺ 1,70,311
അതേസമയം സ്വിഫ്റ്റ് ഒരു തലമുറ മാറ്റത്തിന് തയ്യാറെടുക്കുകയാണ്. ഹാച്ചിന്റെ പുതിയ മോഡൽ ഏപ്രിൽ മാസത്തോടെ ഗണ്യമായ ഡിസൈൻ മാറ്റങ്ങൾ, മെച്ചപ്പെടുത്തിയ സവിശേഷതകൾ, മെക്കാനിക്കൽ അപ്ഗ്രേഡുകൾ എന്നിവയോടെ വരും. ഇതിന്റെ ഉത്പാദനം അടുത്ത മാസം ആരംഭിക്കുമെന്നാണ് റിപ്പോർട്ടുകൾ. ഭാരം കുറഞ്ഞതും ഉയർന്ന കരുത്തുമുള്ള അൾട്രാ-ഹൈ ടെൻസൈൽ സ്റ്റീൽ ഉൾപ്പെടുത്തി ഹാർട്ട്ടെക്റ്റ് പ്ലാറ്റ്ഫോമിന്റെ വളരെയധികം പരിഷ്ക്കരിച്ച പതിപ്പിലാണ് 2024 മാരുതി സ്വിഫ്റ്റ് നിർമ്മിച്ചിരിക്കുന്നത്.നിലവിലെ തലമുറയുമായി താരതമ്യപ്പെടുത്തുമ്പോൾ പുതിയ സ്വിഫ്റ്റിന് ഷാർപ്പായ ഡിസൈൻ ഭാഷ ലഭിക്കും. തലമുറമാറ്റത്തോടെ സ്വിഫ്റ്റിന്റെ നീളം 15 എംഎം വർദ്ധിക്കും. 3860 എംഎം നീളം ലഭിക്കും. അതേസമയം മൊത്തത്തിലുള്ള വീതിയും ഉയരവും യഥാക്രമം 40 മില്ലീമീറ്ററും 30 മില്ലീമീറ്ററും കുറയും. ഫ്ലാറ്റ്-ബോട്ടം സ്റ്റിയറിംഗ് വീൽ, പുതിയ ഡാഷ്ബോർഡ് ഡിസൈൻ, ഡ്യുവൽ-ടോൺ (ബ്ലാക്ക് ആൻഡ് ബീജ്) ഇന്റീരിയർ തീം, കാലാവസ്ഥാ നിയന്ത്രണങ്ങൾക്കായുള്ള ടോഗിൾ സ്വിച്ചുകൾ, പുതിയ ഒമ്പത് ഇഞ്ച് ടച്ച്സ്ക്രീൻ ഇൻഫോടെയ്ൻമെന്റ് വയർലെസ് സ്മർട്ട്ഫോൺ കണക്റ്റിവിറ്റിയുള്ള സിസ്റ്റം എന്നിവ ഉൾപ്പെടെ ഇന്റീരിയർ മാറ്റങ്ങൾ പുതിയ മാരുതി ഫ്രോങ്സിൽ നിന്ന് പ്രചോദനം ഉൾക്കൊണ്ടിരിക്കും.
