മുംബൈ; ബോളിവുഡ് താരം സല്മാന് ഖാന് വീണ്ടും വധഭീഷണി. ഇ-മെയില് വഴിയാണ് വധഭീഷണി. ജയിലിലായ ഗുണ്ടാസംഘം ലോറന്സ് ബിഷ്ണോയിയുടെ സമീപകാല അഭിമുഖത്തെക്കുറിച്ച് പരാമര്ശിക്കുന്ന ഒരു ഇ-മെയിലാണ് നടന്റെ അടുത്ത അനുയായിക്ക് ലഭിച്ചത്. അതില് നടനെ കൊല്ലുക എന്നതാണ് തന്റെ ജീവിതലക്ഷ്യമെന്ന് ബിഷ്ണോയി അവകാശപ്പെടുന്നുണ്ട്. ഭീഷണിയുടെ പശ്ചാത്തലത്തില് സല്മാന് ഖാന്റെ വസതിക്ക് പുറത്ത് സുരക്ഷ ശക്തമാക്കിയിട്ടുണ്ട്.
ഭീഷണി ഇ-മെയിലുമായി ബന്ധപ്പെട്ട് ഗുണ്ടാസംഘങ്ങളായ ലോറന്സ് ബിഷ്നോയ്, ഗോള്ഡി ബ്രാര് എന്നിവര്ക്കെതിരെ മുംബൈ പോലീസ് കേസെടുത്തു. സല്മാന് ഖാന്റെ അടുത്ത അനുയായിയായ പ്രശാന്ത് ഗുഞ്ചാല്ക്കറിന് ശനിയാഴ്ചയാണ് ഭീഷണി സന്ദേശം ലഭിച്ചത്. എഎന്ഐയുടെ റിപ്പോര്ട്ടുകള് പ്രകാരം സല്മാന് ഖാന് ഇമെയിലിലൂടെ ഭീഷണികള് ലഭിച്ചതിനെ തുടര്ന്ന് മുംബൈ പോലീസ് അദ്ദേഹത്തിന്റെ അപ്പാര്ട്ട്മെന്റിന് പുറത്ത് സുരക്ഷ ശക്തമാക്കിയിരുന്നു. മാത്രമല്ല, ഐപിസി 506 (2), 120 (ബി), 34 വകുപ്പുകള് പ്രകാരം ബാന്ദ്ര പോലീസ് കേസ് രജിസ്റ്റര് ചെയ്തിട്ടുണ്ട്.