ദില്ലി: സ്വവര്ഗ പങ്കാളികള്ക്കും കുട്ടികളെ ദത്തെടുക്കാമെന്നും ഇന്ത്യയിലെ നിയമം അതിനനുവദിക്കുന്നുണ്ടെന്നും സുപ്രീംകോടതി. സ്വവര്ഗ വിവാഹവുമായി ബന്ധപ്പെട്ട ഹര്ജികള് പരിഗണിക്കുമ്പോഴായിരുന്നു കോടതിയുടെ നിരീക്ഷണം. ജൈവികമായി മക്കള് ജനിക്കുന്ന, പരമ്പരാഗത രീതിയിലുള്ള കുടുംബ വ്യവസ്ഥയില് പെടാത്ത ദമ്പതികളെയും രാജ്യത്തെ നിയമ വ്യവസ്ഥ അംഗീകരിക്കുന്നുണ്ടെന്നും കോടതി നിരീക്ഷിച്ചു.
എതിര്ലിംഗത്തില് പെടുന്ന ദമ്പതിള്ക്കും സ്വവര്ഗാനുരാഗികളായ ദമ്പതികള്ക്കും സമൂഹത്തില് വ്യത്യസ്ത രീതിയിലുള്ള സമീപനമാണ് ലഭിക്കുന്നത് എന്നും ബാലാവകാശ കമ്മീഷനും മറ്റു ഹര്ജിക്കാര്ക്കും വേണ്ടി ഹാജരായ അഡീഷണല് സോളിസിറ്റര് ജനറല് ഐശ്വര്യ ഭാട്ടി സുപ്രീംകോടതി ബെഞ്ചിനോട് പറഞ്ഞു. വിവിധ കാരണങ്ങള് കൊണ്ട് കുട്ടികളെ ദത്തെടുക്കാന് കഴിയുമെന്ന് രാജ്യത്തെ നിയമത്തില് പറയുന്നതായും സുപ്രീംകോടതി നിരീക്ഷിച്ചു. പങ്കാളികളില്ലാത്ത വ്യക്തികള്ക്കും കുട്ടികളെ ദത്തെടുക്കാം. സ്വവര്ഗ ബന്ധങ്ങളിലുള്ളവര്ക്കും ദത്തെടുക്കാം. ജൈവികമായി കുട്ടിക്കു ജന്മം നല്കാന് ശേഷിയുള്ളവര്ക്കും ദത്തെടുക്കുന്നതിനു തടസമില്ല. ജൈവികമായി കുട്ടിയുണ്ടാകണമെന്ന് ആരെയും നിര്ബന്ധിക്കാനാവില്ലെന്നും ചീഫ് ജസ്റ്റിസ് പറഞ്ഞു.
