എറണാകുളം : നടി മഞ്ജു വാര്യരെ സമൂഹമാധ്യമങ്ങളിലൂടെ നിരന്തരം ഭീഷണിപ്പെടുത്തി എന്ന പരാതിയില്‍ സംവിധായകന്‍ സനല്‍കുമാര്‍ ശശിധരനെ പോലീസ് അറസ്റ്റ് ചെയ്തു. തനിക്കെതിരെ തുടര്‍ച്ചയായി അപവാദം പ്രചരിപ്പിച്ചെന്നും പിന്തുടര്‍ന്ന് ഭീഷണിപ്പെടുത്തി എന്നുമാണ് മഞ്ജുവിന്റെ പരാതി. കേസില്‍ മഞ്ജുവിന്റെ മൊഴി രേഖപ്പെടുത്തിയ ശേഷം എളമക്കര പോലീസ് കേസെടുക്കുകയായിരുന്നു. തിരുവനന്തപുരം പാറശാല മഹാദേവ ക്ഷേത്രത്തിന് സമീപത്ത് വച്ചാണ് സനല്‍കുമാറിനെ ഇന്ന് രാവിലെയോടെ പോലീസ് കസ്റ്റഡിയിലെടുത്തത്. പിന്നീട് അറസ്റ്റ് രേഖപ്പെടുത്തുകയായിരുന്നു.
മഞ്ജു വാര്യരുടെ ജീവന്‍ അപകടത്തിലാണന്നും അവര്‍ ചിലരുടെ തടങ്കലിലാണെന്നും സൂചിപ്പിച്ചുകൊണ്ട് സംവിധായകന്‍ സനല്‍ കുമാര്‍ ശശിധരന്‍ സമൂഹമാധ്യമങ്ങളില്‍ പങ്കുവച്ച പോസ്റ്റുകള്‍ വിവാദമായിരുന്നു. നടിയെ ആക്രമിച്ച കേസിലെ അന്വേഷണ സംഘത്തെ വകവരുത്താന്‍ ഗൂഢാലോചന നടത്തിയെന്ന കേസുമായി ബന്ധപ്പെട്ട് മഞ്ജു വാര്യരുടെ മൊഴിയെടുത്തതിനു തൊട്ടുപിന്നാലെയാണ് കേസിലെ അന്വേഷണ ഉദ്യോഗസ്ഥനെ മാറ്റിയതെന്നും സാഹചര്യങ്ങള്‍ വച്ച്‌ നോക്കുമ്പോള്‍ മഞ്ജു ഉള്‍പ്പെടെ ഉള്ളവര്‍ക്ക് ഭീഷണിയുണ്ടന്നും സനല്‍കുമാര്‍ ആരോപിച്ചിരുന്നു. ഭീഷണിപ്പെടുത്തലിനും, ഐ.ടി നിയമപ്രകാരം സമൂഹമാധ്യമങ്ങളിലൂടെ അപകീര്‍ത്തിപ്പെടുത്തിയതിനുമാണ് കേസ് രജിസ്റ്റര്‍ ചെയ്തത്. നടിയുടെ പരാതി ഗൗരവകരമായി പരിഗണിച്ച്‌ അന്വേഷണം നടത്തി അറസ്റ്റ് നടപടികളിലേക്ക് കടക്കാന്‍ തീരുമാനിച്ചതായി പോലീസ് നേരത്തേ വ്യക്തമാക്കിയിരുന്നു.
