കാലടി : ശ്രീ ശങ്കരാചാര്യ സംസ്കൃത സർവ്വകലാശാലയിലെ ശങ്കരജയന്തി ആഘോഷങ്ങൾ മെയ് അഞ്ചിന് കാലടി മുഖ്യക്യാമ്പസിൽ നടക്കുമെന്ന് സർവ്വകലാശാല അറിയിച്ചു. രാവിലെ 10.15ന് സർവ്വകലാശാല ഭരണവിഭാഗം കാര്യാലയത്തിലെ ശ്രീ ശങ്കര പ്രതിമയ്ക്ക് മുന്നിൽ നടക്കുന്ന ശ്രദ്ധാഞ്ജലിയോടെ ആഘോഷങ്ങൾ ആരംഭിക്കും. 10.30ന് സംഗീത വിഭാഗം വിദ്യാർത്ഥികൾ അവതരിപ്പിക്കുന്ന സംഗീതാർച്ചന യൂട്ടിലിറ്റി സെന്ററിലെ സെമിനാർ ഹാളിൽ നടക്കും. 10.30ന് സംഘടിപ്പിച്ചിരിക്കുന്ന ശ്രീ ശങ്കര വാർഷിക പ്രഭാഷണത്തിൽ വൈസ് ചാൻസലർ ഡോ.എം.വി നാരായണൻ ആമുഖ പ്രഭാഷണം നിർവ്വഹിക്കും.
മുംബൈ ടാറ്റാ ഇൻസ്റ്റിറ്റ്യൂട്ട് ഓഫ് ഫണ്ടമെന്റൽ റിസർച്ചിലെ ഫിസിക്സ് വിഭാഗം മുൻ പ്രൊഫസർ പി.പി ദിവാകരൻ ശ്രീ ശങ്കര വാർഷിക പ്രഭാഷണം നിർവ്വഹിക്കും. ‘ഭാരതത്തിന്റെ സാംസ്കാരിക തനിമയുടെ രൂപീകരണത്തിൽ ഗണിതശാസ്ത്രത്തിന്റെ സ്ഥാനം’ എന്നതാണ് പ്രഭാഷണ വിഷയം. ശാസ്ത്രസംവർദ്ധിനി കേന്ദ്രം ഓണററി ഡയറക്ടർ പ്രൊഫ.വി.രാമകൃഷ്ണ ഭട്ട് എൻഡോവ്മെന്റുകൾ വിതരണം ചെയ്യും. രജിസ്ട്രാർ ഡോ.എം.ബി ഗോപാലകൃഷ്ണൻ, ശങ്കരജയന്തി ആഘോഷ കമ്മിറ്റി കൺവീനർ ഡോ.വി.കെ ഭവാനി എന്നിവർ പ്രസംഗിക്കും. ഉച്ചകഴിഞ്ഞ് 2.30 ന് യൂട്ടിലിറ്റി സെന്ററിലെ സെമിനാർ ഹാളിൽ എം.എഫ്.എ വിദ്യാർത്ഥികളുടെ ചിത്രകലാ പ്രദർശനവും വൈകിട്ട് നാലിന് ഭരതനാട്യം, മോഹിനിയാട്ടം വിഭാഗങ്ങളുടെ നൃത്താവതരണവും നടക്കും.
സംസ്കൃത സർവ്വകലാശാല : പരീക്ഷ മാറ്റി
ശ്രീ ശങ്കരാചാര്യ സംസ്കൃത സർവ്വകലാശാല മെയ് മൂന്നിന് നടത്തുവാൻ നിശ്ചയിച്ചിരുന്ന നാലാം സെമസ്റ്റർ ബി. എ. പരീക്ഷ (സോഷ്യൽ മീഡിയ ആൻഡ് സൈബർ എത്തിക്സ്) മെയ് നാലിലേയ്ക്ക് മാറ്റിയതായി സർവ്വകലാശാല അറിയിച്ചു.
