തിരുവനന്തപുരം: കെട്ടിട നിർമാണത്തിന്റെ പേരിൽ ആളുകളിൽ നിന്ന് കോടികളുടെ തട്ടിപ്പ് നടത്തിയ മാസ്റ്റർ ബിൽറ്റ് കമ്പനി എംഡി ശരത് അറസ്റ്റിൽ. പ്രതിയെ ഇൻഫോ പാർക്ക് പോലീസ് ചെന്നൈയിൽ നിന്നാണ് പിടികൂടിയത്. കേസിലെ മറ്റ് പ്രതികളായ കൃഷ്ണപ്രസാദ്, ലിയോ എന്നിവരെ മുമ്പ് അറസ്റ്റ് ചെയ്തിരുന്നു. ഒളിവിൽ കഴിഞ്ഞിരുന്ന ശരത്തിനെ സഹോദരന്റെ മൊബൈൽ ഫോൺ സിം കേന്ദ്രീകരിച്ച് നടത്തിയ ശാസ്ത്രീയ അന്വേഷണത്തിനൊടുവിലാണ് പോലീസ് കണ്ടെത്തിയത്. ഇൻഫോപാർക്ക് പോലീസ് സ്റ്റേഷനിലെ എസ്ഐ ബദറുദ്ദീൻ, എസ്സിപിഒ കണ്ണൻ എന്നിവരടങ്ങുന്ന സംഘം ചെന്നൈയിൽ ക്യാമ്പ് ചെയ്താണ് പ്രതിയെ കസ്റ്റഡിയിലെടുത്തത്.
വീടും ഫ്ലാറ്റുകളും നിർമ്മിച്ച് നൽകാം എന്ന് വാഗ്ദാനം ചെയ്ത് ജനങ്ങളിൽ നിന്ന് വൻ തുക പണമായി സ്വീകരിക്കുകയും എന്നാൽ കൃത്യസമയത്തോ ആവശ്യപ്പെട്ട രീതിയിലോ നിർമ്മാണം പൂർത്തിയാക്കി നൽകാതെ വഞ്ചിക്കുകയുമായിരുന്നു ഇയാളുടെ തട്ടിപ്പ് രീതി. നിസാർ എന്ന വ്യക്തിയിൽ നിന്ന് ഫ്ലാറ്റ് നിർമ്മിച്ച് നൽകാം എന്ന് വിശ്വസിപ്പിച്ച് 22.15 ലക്ഷം രൂപ വാങ്ങിയ ശേഷം നിർമ്മാണം പൂർത്തിയാക്കി നൽകാതിരുന്ന സംഭവത്തിലാണ് ഒടുവിലത്തെ കേസും അറസ്റ്റും. കേസിൽ പങ്കാളികളായ മാസ്റ്റർ ബിൽറ്റ് കമ്പനി ഭാരവാഹികളായ കൃഷ്ണപ്രസാദ്, ലിയോ എന്നിവരെ പോലീസ് നേരത്തെ അറസ്റ്റ് ചെയ്തിരുന്നു.
