കോട്ടയം : ന്യൂനപക്ഷ സ്കോളര്ഷിപ്പില് വീണ്ടും വിശദീകരണവുമായി പ്രതിപക്ഷനേതാവ് വി.ഡി സതീശന്. യു.ഡി.എഫ് ഫോര്മുല സര്ക്കാര് പൂര്ണമായി പരിഗണിച്ചില്ല. ഭാഗികമായി മാത്രമാണ് സര്ക്കാര് തീരുമാനത്തെ താന് സ്വാഗതം ചെയ്തത്. ലീഗിന്റെ അഭിപ്രായവും സര്ക്കാര് പരിഗണിക്കണം. വിഷയം യു.ഡി.എഫ് ചര്ച്ച ചെയ്യും. മുസ്ലിംകള്ക്കായി മാത്രമുള്ള പദ്ധതി നഷ്ടമായതാണ് ലീഗിന്റെ പരാതിയെന്നും സതീശന് പറഞ്ഞു.
സച്ചാര് കമ്മിറ്റിക്കുപകരം പാലോളി കമ്മിറ്റിയെ വച്ചതുതന്നെ സ്കോളര്ഷിപ്പില് വെള്ളം ചേര്ക്കാനാണെന്ന് മുസ്ലിം ലീഗ് ആരോപിച്ചു. ഇപ്പോള് ആനുകൂല്യങ്ങള് വീണ്ടും കുറച്ചെന്ന് ലീഗ് നേതാവ് സാദിഖലി ശിഹാബ് തങ്ങള് പറഞ്ഞു. അനാവശ്യ സ്പര്ധയുണ്ടാക്കാനാണ് സര്ക്കാരിന്റെ നീക്കം. സച്ചാര് കമ്മിറ്റി ആനുകൂല്യങ്ങള് മുസ്ലിംകള്ക്ക്, മറ്റുള്ളവര്ക്ക് വേറെ കമ്മിറ്റി വരട്ടെയെന്നും നേതാക്കള് ആവശ്യപ്പെട്ടു.
സര്ക്കാരിന്റെ തീരുമാനത്തെ ഒരുതരത്തിലും സ്വാഗതം ചെയ്യുന്നില്ലെന്നു പി.കെ കുഞ്ഞാലിക്കുട്ടി വ്യക്തമാക്കി. നിയമസഭയിലും സമാനമായ നിലപാട് എടുക്കും. പ്രതിപക്ഷ നേതാവ് പറഞ്ഞത് അദ്ദേഹം തന്നെ വിശദീകരിച്ചിട്ടുണ്ട്. സതീശനോട് ഫോണില് സംസാരിച്ചതായും കുഞ്ഞാലിക്കുട്ടി പറഞ്ഞു.