തിരുവനന്തപുരം : മലയാളം മഹാനിഘണ്ടുവിന്റെ എഡിറ്ററായ സംസ്കൃതം പ്രഫസര്ക്ക് ബഹുഭാഷാ നിഘണ്ടു തയാറാക്കാന് മുന്പ് യുജിസി 7,81,600 രൂപ അനുവദിച്ചെങ്കിലും പദ്ധതി പാതിവഴിയില് ഉപേക്ഷിച്ചുവെന്ന ഗുരുതര ആക്ഷേപവുമായി സേവ് യൂണിവേഴ്സിറ്റി ക്യാംപെയ്ന് കമ്മിറ്റി രംഗത്ത്. ഇങ്ങനെയുള്ളയാളെ ആണ് കേരള സര്വകലാശാല മഹാനിഘണ്ടുവിന്റെ ചുമതല ഏല്പിച്ചിരിക്കുന്നതെന്നും അവര് ചൂണ്ടിക്കാട്ടി.
പ്രധാന ദ്രാവിഡ ഭാഷകളുടെയും ഏതാനും ഇന്ഡോ – യൂറോപ്യന് ഭാഷകളുടെയും നിഘണ്ടുവായ ‘ബഹുഭാഷാ ബോധിനി’ തയാറാക്കാനാണ് ഈ പ്രഫസര്ക്കു 2012 ഫെബ്രുവരിയില് യുജിസി തുക അനുവദിച്ചത്. യുജിസി ഉത്തരവ് പ്രകാരം ഡിസംബര് മാസത്തില് ഈ തുക കേന്ദ്ര സര്ക്കാര് സംസ്കൃത സര്വകലാശാലയ്ക്കു കൈമാറിയിരുന്നു. 5 വര്ഷം കഴിഞ്ഞിട്ടും നിഘണ്ടു നിര്മാണം ആരംഭിക്കാത്തതു കൊണ്ട് അനുവദിച്ച തുക മടക്കി നല്കാന് സംസ്കൃത സര്കലാശാലാ അധികൃതര് പ്രഫസറോട് ആവശ്യപ്പെട്ടു.
നിഘണ്ടു നിര്മാണത്തിന് യുജിസി അനുവദിച്ചിരുന്നത് 2 വര്ഷം ആയിരുന്നു. ഇക്കാര്യത്തില് ഗുരുതര വീഴ്ചയാണ് പ്രഫസര് വരുത്തിയതെന്നാണ് ആക്ഷേപം. വിവിധ ഭാഷകളില് പാണ്ഡിത്യമുള്ള ബഹുഭാഷാ പ്രതിഭ ആയതു കൊണ്ടാണ് ഇവരെ സര്വകലാശാലാ ഓര്ഡിനന്സിലെ യോഗ്യതാ വ്യവസ്ഥകള് ലംഘിച്ച് എഡിറ്ററായി നിയമിച്ചതെന്നാണ് സര്വകലാശാലയുടെ വിശദീകരണം.
