റിയാദ് : ഗള്ഫ് രാജ്യങ്ങളില് ജോലി അന്വേഷിക്കുന്നവര്ക്ക് സുവര്ണ അവസരവുമായി സൗദി. സൗദി കിരീടാവകാശി മുഹമ്മദ് ബിന് സല്മാന് രാജകുമാരനാണ് ‘അലാത്ത്’ എന്ന പേരില് ഒരു പൊതു നിക്ഷേപ ഫണ്ട് കമ്പനി ആരംഭിക്കുന്നത്. ഇതിലൂടെ 39,000 നേരിട്ടുള്ള തൊഴിലവസരങ്ങള് സൃഷ്ട്ടിക്കും. സൗദിയെ നൂതന വ്യവസായങ്ങളുടെയും ഇലക്ട്രോണിക്സ് ഉല്പ്പനങ്ങളുടെയും ലോകത്തിലെ ഒരു വലിയ ഹബ്ബാക്കി മാറ്റുകയാണ് ലക്ഷ്യമെന്ന് പബ്ലിക് ഇന്വെസ്റ്റ്മെന്റ് ഫണ്ടിന്റെ ഡയറക്ടര് ബോര്ഡ് ചെയര്മാനുമായ സൗദി കിരീടാവകാശി മുഹമ്മദ് ബിന് സല്മാന് രാജകുമാരന് പ്രഖ്യാപിച്ചു. 2030-ഓടെ സൗദി അറേബ്യയില് 9.3 ബില്യന് ഡോളറിന്റെ നേരിട്ടുള്ള എണ്ണ ഇതര ജിഡിപി വരുമാനം നേടുകയുമാണ് ലക്ഷ്യം.
രാജ്യത്ത് പുതിയ വ്യവസായവത്കരണമാണ് വരുന്നത്. പ്രാദേശിക കഴിവുകള് വികസിപ്പിച്ച് സ്വകാര്യ മേഖലയെ ശക്തിപ്പെടുത്തുന്നുണ്ട്. ശുദ്ധമായ ഊര്ജ്ജ സ്രോതസ്സുകളെ അടിസ്ഥാനമാക്കിയുള്ള സുസ്ഥിര വ്യാവസായിക വിപ്ലവങ്ങളും അതിലൂടെ രാജ്യത്തിന്റെ മുഖച്ഛായ മാറ്റുകയും ആണ് ചെയ്യുന്നത്. വീട്ടുപകരങ്ങള്, സ്മാര്ട്ട് ഇലക്ട്രോണിക് ഉപകരണങ്ങള്, രാജ്യത്തിന്റെ അടിസ്ഥാന സൗകര്യങ്ങള് തുടങ്ങിയ വിഭാഗത്തില് തന്ത്രപ്രധാനമായ ബിസിനസ് യൂണിറ്റുകള് പ്രദേശികമായി കൊണ്ടുവരാന് ആണ് തീരുമാനിച്ചിരിക്കുന്നത്. ഇത് ആഗോള വിപണിയെ തൃപ്തിപ്പെടുത്തുന്ന തരത്തില് ആണ് സൗദി ലോകത്തിന് സംഭാവന ചെയ്യുക.
