ജയ്പൂര് : രാജസ്ഥാനിലെ കരൗലിയിലെ എസ്ബിഐ ശാഖയുടെ ലോക്കറില്നിന്ന് 11 കോടി രൂപയുടെ നാണയങ്ങള് കാണാതായ സംഭവത്തില് വ്യാഴാഴ്ച 25 സ്ഥലങ്ങളില് സിബിഐ പരിശോധന നടത്തി. ഡല്ഹി, ജയ്പുര്, ദൗസ, കരൗലി, സവായ് മധോപുര്, അല്വാര്, ഉദയ്പുര്, ഭില്വാര എന്നിവിടങ്ങളിലെ 25 പ്രദേശങ്ങളിലായി 15 ഓളം മുന് ബാങ്ക് ഉദ്യോഗസ്ഥരുടെയും കേസുമായി ബന്ധപ്പെട്ട മറ്റുള്ളവരുടെയും താമസസ്ഥലങ്ങളിലാണ് തെരച്ചില് നടന്നത്.
രാജസ്ഥാന് ഹൈക്കോടതിയുടെ ഉത്തരവ് പ്രകാരം ഏപ്രില് 13 ന് ആണ് സിബിഐ കേസ് രജിസ്റ്റര് ചെയ്യുന്നത്. പണത്തിന്റെ കരുതല് ശേഖരത്തില് പൊരുത്തക്കേടുണ്ടെന്ന് പ്രാഥമിക അന്വേഷണത്തില് തെളിഞ്ഞതിനെ തുടര്ന്ന് 2021 ഓഗസ്റ്റില് പണം എണ്ണാന് ബാങ്ക് തീരുമാനിച്ചു. ഇതോടെയാണ് വന്കൊള്ള പുറത്തുവന്നത്. സ്വകാര്യ ഏജന്സിയാണ് നാണയങ്ങള് എണ്ണി തിട്ടപ്പെടുത്തിയത്. ഇവരുടെ പരിശോധനയില് 11 കോടിയിലധികം മൂല്യമുള്ള നാണയങ്ങള് ബാങ്കില്നിന്നും നഷ്ടപ്പെട്ടതായി കണ്ടെത്തി. നാണയങ്ങള് എണ്ണി തിട്ടപ്പെടുത്തിയപ്പോള് 3000 ബാഗുകളിലായി രണ്ടു കോടി രൂപ മാത്രമാണ് ലഭിച്ചത്.
