ന്യൂഡല്ഹി : ഹിജാബ് അനിവാര്യമായ മതാചാരമാണോ എന്ന ചോദ്യത്തിലേക്ക് കര്ണാടക ഹൈക്കോടതി കടക്കരുതായിരുന്നെന്ന നിരീക്ഷണവുമായി സുപ്രീംകോടതി. കര്ണാടകത്തിലെ വിദ്യാഭ്യാസ സ്ഥാപനങ്ങളില് ഹിജാബ് വിലക്ക് ചോദ്യംചെയ്തുള്ള ഹര്ജിയിലാണ് പരാമര്ശം. എട്ടാം ദിനം വാദം കേട്ട ജസ്റ്റിസ് ഹേമന്ത് ഗുപ്ത, സുധാന്ഷു ധൂലിയ എന്നിവരടങ്ങിയ ബെഞ്ചാണ് നിരീക്ഷണം നടത്തിയത്. കര്ണാടക സര്ക്കാരിനുവേണ്ടി ഹാജരായ സോളിസിറ്റര് ജനറല് തുഷാര് മേത്ത ഹര്ജിക്കാരാണ് ആ വിഷയം ഹൈക്കോടതിയില് ഉന്നയിച്ചതെന്ന് മറുപടി നല്കി.
ഖുര്ആനിലെ പരാമര്ശംകൊണ്ടുമാത്രം ഹിജാബ് മതപരമായ അനിവാര്യതയാകില്ലെന്നും മേത്ത വാദിച്ചു. പുരാതനകാലം മുതലേ ആരംഭിച്ചതും മതവുമായി സഹവര്ത്തിത്വമുള്ളതും മതത്തിന്റെ സ്വഭാവം നിര്ണയിക്കുന്നതുമായ ആചാരങ്ങളെ മാത്രമേ അനിവാര്യമായി കാണാനാകൂവെന്നും അദ്ദേഹം വാദിച്ചു. ബുധനാഴ്ചയും വാദം തുടരും.
