തൊടുപുഴ : സ്കൂള് ബസിന്റെ ടയറിന് അടിയില്പ്പെട്ട് ക്ലീനര് മരിച്ചു. തൊടുപുഴ മലയിഞ്ചി സ്വദേശി ജിജോ പടിഞ്ഞാറയില് (40) ആണ് മരിച്ചത്. കുട്ടികള് ബെല്ലടിച്ചതിനെ തുടര്ന്ന് മുന്നോട്ടുനീങ്ങിയ ബസിലേക്ക് ഓടിക്കയറാന് ശ്രമിക്കുന്നതിനിടെയാണ് അപകടം. ബസിലേക്ക് കയറാന് ശ്രമിക്കുന്നതിനിടെ കാല്വഴുതി വീണ ജിജോ ടയറിന് അടിയില്പ്പെടുകയായിരുന്നു. ഉടുമ്പന്നൂര് സെന്റ് ജോര്ജ് സ്കൂളിന്റെ ബസ് ക്ലീനറാണ് ജിജോ.
തൊടുപുഴ ചീനിക്കുഴിക്ക് സമീപം ഏഴാനിക്കൂട്ടത്താണ് സംഭവം. രാവിലെ സ്കൂളിലേക്ക് പോകുന്നതിനായി കുട്ടികളെ കയറ്റുമ്പോഴാണ് അപകടം. ബസ് നിര്ത്തി ജിജോ പുറത്തിറങ്ങിയ സമയത്ത് അകത്തുണ്ടായിരുന്ന കുട്ടികള് ബെല്ലടിക്കുകയായിരുന്നു. ജിജോ കയറാത്തത് ശ്രദ്ധിക്കാതെ ഡ്രൈവര് ബസ് മുന്നോട്ടെടുത്തു. ഇതുകണ്ട് ബസിലേക്ക് ഓടിക്കയറുമ്പോഴാണ് ജിജോ കാല്വഴുതി വീണത്. ജിജോയുടെ ശരീരത്തിലൂടെ ബസിന്റെ പിന്ഭാഗത്തെ ചക്രം കയറിയിറങ്ങുകയായിരുന്നു. മൃതദേഹം മുതലക്കോടം ആശുപത്രിയില്. സംഭവത്തില് പോലീസ് കേസെടുത്തിട്ടുണ്ട്.
