റാന്നി: പുനലൂർ – മൂവാറ്റുപുഴ സംസ്ഥാന പാതയിലെ റാന്നി മാമ്മുക്ക് ജംഗ്ഷനിൽ സ്കൂൾ ബസും ചരക്കു വാഹനവും കൂട്ടിയിടിച്ച് അപകടം. കുമ്പഴ മൗണ്ട് ബഥനി സ്കൂളിന്റെ ബസിലാണ് ലോറി ഇടിച്ചത്. ഇന്ന് രാവിലെ 8:10-ഓടെയായിരുന്നു സംഭവം. അപകടത്തിൽ ബസ്സിലുണ്ടായിരുന്ന വിദ്യാർത്ഥികൾക്ക് നിസ്സാര പരിക്കേറ്റു.
പേട്ട ഭാഗത്തുനിന്നും പത്തനംതിട്ട ഭാഗത്തേക്ക് തിരിയുകയായിരുന്ന സ്കൂൾ ബസ്സിലേക്ക്, മെയിൻ റോഡിലൂടെ ഇട്ടിയപ്പാറ ഭാഗത്തുനിന്നും വന്ന ചരക്കു വാഹനം ഇടിക്കുകയായിരുന്നു. ബസിന്റെ പുറകിലെ വാതിലിന്റെ ഭാഗത്താണ് ലോറി ഇടിച്ചത്. സ്കൂൾ സമയത്തായതിനാൽ അപകടത്തെ തുടർന്ന് റോഡിൽ വലിയ രീതിയിലുള്ള വാഹന ഗതാഗത തടസ്സം നേരിട്ടു.
വിവരമറിഞ്ഞ് റാന്നി പോലീസ് ഉടനടി സ്ഥലത്തെത്തുകയും അപകടത്തിൽപ്പെട്ട വാഹനങ്ങൾ മാറ്റി ഗതാഗതം പുനഃസ്ഥാപിക്കാനുള്ള നടപടികൾ സ്വീകരിക്കുകയും ചെയ്തു. പരിക്കേറ്റ കുട്ടികളെ പ്രാഥമിക ശുശ്രൂഷകൾക്കായി റാന്നി താലൂക്ക് ആശുപത്രിയിലേക്ക് മാറ്റിയിട്ടുണ്ട്. ആരുടെയും പരിക്ക് ഗുരുതരമല്ലെന്നാണ് ലഭിക്കുന്ന വിവരം. അപകടത്തെക്കുറിച്ച് റാന്നി പോലീസ് അന്വേഷണം ആരംഭിച്ചു.
