തിരുവനന്തപുരം : ഓട്ടത്തിനിടെ സ്‌കൂള്‍ ബസിന്റെ എമര്‍ജന്‍സി വാതിലിലൂടെ എല്‍കെജി വിദ്യാര്‍ത്ഥിനി പുറത്തേക്ക് വീണ സംഭവത്തില്‍ പോലീസ് പ്രതികളെ സംരക്ഷിക്കുന്നതായി ആരോപണം. എല്‍.കെ.ജി. വിദ്യാര്‍ത്ഥിക്ക് വീഴ്ചയില്‍ ഗുരുതരമായി പരിക്കേറ്റിരുന്നു. സംഭവത്തില്‍ പ്രതിയുടെ പേരില്ലാതെയാണ് പോലീസ് എഫ്.ഐ.ആര്‍ തയ്യാറാക്കിയത്. മോട്ടോര്‍ വാഹനവകുപ്പ് പരിശോധനയില്‍ സ്‌കൂളധികൃതരുടെയും ഡ്രൈവറുടെയും ഭാഗത്ത് ഗുരുതരമായ വീഴ്ച സംഭവിച്ചെന്ന കണ്ടെത്തലുണ്ടായിട്ടും എഫ്.ഐ.ആറില്‍ ഡ്രൈവറുടെയോ ബസ് അധികൃതരുടെയോ പേരില്ലാത്തത് പ്രതികളെ സംരക്ഷിക്കാനാണെന്ന ആരോപണമാണ് ഇപ്പോള്‍ ഉയരുന്നത്.
ഈമാസം അഞ്ചിന് ചൊവ്വാഴ്ച വൈകീട്ട് 3.45ന് കടുത്തുരുത്തി-പെരുവ റോഡില്‍ മങ്ങാട് ഷാപ്പുംപടി ഭാഗത്താണ് അപകടമുണ്ടായത്. എന്നാല്‍ കടുത്തുരുത്തി പോലീസ് എഫ്.ഐ.ആര്‍ രജിസ്റ്റര്‍ ചെയ്തത് ഏഴാം തീയതി നാല് മണിക്ക് മാത്രമാണ്. കടുത്തുരുത്തി കൈയാലയ്ക്കല്‍ അനില്‍ അരവിന്ദാക്ഷന്റെ മകന്‍ അദ്വൈത് (നാല്) ആണ് അപകടത്തില്‍പ്പെട്ടത്. കെ.എസ്.പുരത്ത് പ്രവര്‍ത്തിക്കുന്ന സ്വകാര്യ സ്‌കൂളിലെ വിദ്യാര്‍ത്ഥിയാണ് അദ്വൈത്.
ബസിന്റെ എമര്‍ജന്‍സി വാതിലിന്റെ സുരക്ഷയ്ക്കായുള്ള കവചം പൊട്ടിയ നിലയിലായിരുന്നുവെന്ന് മോട്ടോര്‍ വാഹന വകുപ്പ് കണ്ടെത്തിയിരുന്നു. ഇതാകാം വാതില്‍ തുറന്ന് കുട്ടി പുറത്തേക്ക് തെറിച്ചുവീഴാനിടയാക്കിയതെന്നാണ് മോട്ടോര്‍വാഹനവകുപ്പ് ഉദ്യോഗസ്ഥര്‍ പറയുന്നത്. എമര്‍ജന്‍സി വാതിലിന്റെ കവര്‍ പൊട്ടിയ നിലയിലായിട്ടും വിദ്യാര്‍ത്ഥികളുമായി ബസ് സര്‍വീസ് നടത്തിയത് വീഴ്ചയാണ്. വാഹനമോടിച്ച ഡ്രൈവറോട് അപകടം സംബന്ധിച്ച്‌ വിശദീകരണം നല്‍കാനും നിര്‍ദ്ദേശം നല്‍കിയിട്ടുണ്ട്.
