തിരുവനന്തപുരം : ഒരിടവേളക്ക് ശേഷം സ്കൂളുകള് വീണ്ടും സാധാരണ നിലയിലാവുകയാണ്. സംസ്ഥാനത്തെ സ്കൂളുകളില് നാളെ മുതല് പൂര്ണ തോതില് ക്ലാസുകള് ആരംഭിക്കും. 47 ലക്ഷം വിദ്യാര്ഥികളാണ് സ്കൂളിലെത്തുക. ഒരുക്കങ്ങളെല്ലാം പൂര്ത്തിയായെന്ന് വിദ്യാഭ്യാസ വകുപ്പ് അറിയിച്ചു. പ്രീ പ്രൈമറി ഒഴികെയുള്ള ക്ലാസുകളാണ് പഴയ രീതിയില് തുടങ്ങുന്നത്. ഒന്ന് മുതല് 10 വരെ 38 ലക്ഷവും ഹയര് സെക്കണ്ടറി വിഭാഗത്തില് ഏഴര ലക്ഷത്തോളവും വൊക്കേഷണല് ഹയര് സെക്കണ്ടറിയില് അറുപതിനായിരത്തോളം വിദ്യാര്ഥികളും ക്ലാസുകളിലെത്തും. ഒരു ലക്ഷത്തില്പരം അധ്യാപകരും സ്കൂളുകളിലുണ്ടാകും.
2020 മാര്ച്ചില് അടച്ചുപൂട്ടിയ സ്കൂളുകള്. 23 മാസത്തെ നീണ്ട ഇടവേളയ്ക്ക് ശേഷമാണ് നാളെ മുതല് പൂര്ണതോതില് പ്രവര്ത്തനമാരംഭിക്കുന്നത്. 47 ലക്ഷത്തോളം വിദ്യാര്ത്ഥികളാകും നാളെ സ്കൂളുകളിലെത്തുക. ഒന്ന് മുതല് പത്ത് വരെ 38 ലക്ഷത്തില്പരം വിദ്യാര്ത്ഥികളും ഹയര് സെക്കണ്ടറി വിഭാഗത്തില് ഏഴര ലക്ഷത്തോളം വിദ്യാര്ത്ഥികളും വൊക്കേഷണല് ഹയര് സെക്കണ്ടറി വിഭാഗത്തില് അറുപത്തി ആറായിരത്തോളം വിദ്യാര്ത്ഥികളുമാണുള്ളത്. ഒരുക്കങ്ങള് പൂര്ത്തിയായതായി മന്ത്രി വി.ശിവന്കുട്ടി പറഞ്ഞു. സ്കൂളുകളില് ശുചീകരണ പ്രവര്ത്തനങ്ങള് അവസാന ഘട്ടത്തിലാണ്. മാര്ഗരേഖ നിര്ദ്ദേശിച്ച പ്രകാരം കോവിഡ് മാനദണ്ഡങ്ങള് പാലിച്ച് ആകും സ്കൂളുകളുടെ നടത്തിപ്പെന്ന് മന്ത്രി വ്യക്തമാക്കി.
പ്രീപ്രൈമറി വിഭാഗത്തില് തിങ്കള് മുതല് വെള്ളി വരെ ദിവസം 50 ശതമാനം കുട്ടികളെ ഉള്പ്പെടുത്തി ഉച്ച വരെ ക്ലാസുണ്ടാകും. എട്ടാം ക്ലാസു വരെയുള്ള വിദ്യാര്ഥികള്ക്ക് ഉച്ചഭക്ഷണം വിതരണം ചെയ്യുമെന്നും വിദ്യാഭ്യാസ വകുപ്പ് അറിയിച്ചു. യൂണിഫോമിലും ഹാജറിലും കടുംപിടുത്തം വേണ്ടെന്നാണ് നിര്ദേശം. ഇന്നലെ ആരംഭിച്ച സ്കൂളുകളിലെ ശുചീകരണ പ്രവര്ത്തനങ്ങള് ഇന്നും തുടരും. കോവിഡ് മാനദണ്ഡങ്ങള് പാലിച്ചായിരിക്കും സ്കൂള് നടത്തിപ്പെന്നും വിദ്യാര്ഥികള്ക്കും രക്ഷിതാക്കള്ക്കും ആശങ്ക വേണ്ടെന്നും വിദ്യാഭ്യാസമന്ത്രി വി.ശിവന്കുട്ടി വ്യക്തമാക്കി.
