ശാസ്താംകോട്ട : ആക്രിക്കടക്കു മുന്നില്‍ സൂക്ഷിച്ചിരുന്ന സാധനങ്ങള്‍ തീപിടിച്ച്‌ നശിച്ചു.വ്യാഴാഴ്ച പുലര്‍ച്ച നാലരയോടെ സിനിമാ പറമ്പില്‍ കെ.എസ്.ഇ.ബി സബ് സ്റ്റേഷനു മുന്നിലുള്ള ശാസ്താംകോട്ട പാറയില്‍മുക്ക് സ്വദേശിയുടെ ആക്രിക്കടയിലാണ് തീപിടിത്തമുണ്ടായത്. റോഡരികിലുള്ള കടയുടെ വരാന്തയില്‍ സൂക്ഷിച്ചിരുന്ന പേപ്പര്‍ ബോര്‍ഡുകളിലാണ് തീ പടര്‍ന്നത്. പ്രഭാത സവാരിക്കിറങ്ങിയവരാണ് തീ പടരുന്നത് കണ്ടത്. ഉടന്‍ അഗ്നിരക്ഷാസേനയെത്തി തീ നിയന്ത്രണ വിധേയമാക്കിയതിനാല്‍ കൂടുതല്‍ ഭാഗത്തേക്ക് പടര്‍ന്നില്ല.
2017ല്‍ ഇവിടെയുണ്ടായ തീപിടിത്തത്തില്‍ വന്‍ നാശനഷ്ടമുണ്ടായിരുന്നു.അന്ന് സമീപ വീടുകളിലേക്കും തീ പടര്‍ന്നു. ഒരു സുരക്ഷാ സംവിധാനങ്ങളോ മുന്‍കരുതലുകളോ കൂടാതെ അലക്ഷ്യമായാണ് ആക്രി സാധനങ്ങള്‍ ഇവിടെ സൂക്ഷിക്കുന്നത്.പെട്ടെന്ന് തീപിടിക്കാവുന്നതും കേടായതുമായ ഇലക്‌ട്രിക് – ഇലക്‌ട്രോണിക്സ് ഉപകരണങ്ങളും പലയിടത്തായി കിടക്കുന്നുണ്ട്.വലിയ വൈദ്യുതി നിലയങ്ങളില്‍ നിന്ന് സബ് സ്റ്റേഷനിലേക്ക് വൈദ്യുതി എത്തിക്കുന്ന ലൈനുകളും 111 കെ.വി ലൈനും കടന്നുപോകുന്നത് ഈ ആക്രിക്കടക്ക് മുന്നിലൂടെയാണ്. സമീപത്തായി നിരവധി വീടുകളും ഇരുചക്രവാഹന ഷോറൂം ഉള്‍പ്പെടെ സ്ഥാപനങ്ങളുമുണ്ട്.
യഥാസമയം രക്ഷാപ്രവര്‍ത്തനം നടന്നതുകൊണ്ടാണ് വലിയ അത്യാഹിതം ഒഴിവായത്. ശാസ്താംകോട്ടയിലെ രണ്ട് യൂണിറ്റിനോടൊപ്പം കരുനാഗപ്പള്ളി, കൊട്ടാരക്കര എന്നിവിടങ്ങളില്‍ നിന്നെത്തിയ ഓരോ യൂണിറ്റ് ഫയര്‍എന്‍ജിനുകളാണ് തീ അണച്ചത്.രക്ഷാപ്രവര്‍ത്തനങ്ങള്‍ക്ക് ശാസ്താംകോട്ട അഗ്നിരക്ഷാസേനയിലെ അസിസ്റ്റന്റ്സ്റ്റേഷന്‍ ഓഫീസര്‍ ജി. പ്രസന്നന്‍ പിള്ളയുടെ നേതൃത്വത്തിലുള്ള ജീവനക്കാര്‍ നേതൃത്വം നല്‍കി.
