കോഴിക്കോട് : യുവ തിരക്കഥാകൃത്ത് ഹരിപ്രസാദ് കൊളേരി (45) കോവിഡ് ബാധിച്ച്‌ മരിച്ചു. കുഞ്ഞിരാമന്റെ കുപ്പായം, പൂഴിക്കടകന്‍ എന്നീ സിനിമകളുടെ തിരക്കഥ എഴുതിയത് ഹരിപ്രസാദ് ആണ്. കഴിഞ്ഞ 16ന് കോവിഡ് സ്ഥിരീകരിച്ചതോടെ കോഴിക്കോട് സ്വകാര്യ ആശുപത്രിയില്‍ ചികിത്സയിലായിരുന്നു. ഇതിനിടെ ഗിലന്‍ ബാരി സിന്‍ഡ്രോം കൂടി ബാധിച്ചതോടെ ആരോഗ്യനില മോശമായി. തുടര്‍ന്ന് മെഡിക്കല്‍ കോളജ് ആശുപത്രിലേക്കു മാറ്റി. അവിടെ ചികിത്സയില്‍ കഴിയുന്നതിനിടെയാണ് അന്ത്യം. അവിവാഹിതനാണ്.
സിദ്ദിഖ് ചേന്ദമംഗലൂര്‍ സംവിധാനം ചെയ്യുന്ന ഗെറ്റുഗദര്‍ സിനിമയുടെ തിരക്കഥ പൂര്‍ത്തീകരിച്ച്‌ ചിത്രീകരണം തുടങ്ങാനിരിക്കുകയായിരുന്നു. കോഴിക്കോട് ജില്ലയിലെ മടവൂര്‍ ആണ് സ്വദേശം. മടവൂര്‍ കോളേരി പരേതനായ പത്മനാഭന്‍ നായരുടെയും (റിട്ട.എഫ്സിഐ) പാറക്കല്‍ സുഭദ്രയുടെയും മകനാണ്. സഹോദരന്‍: ജയപ്രസാദ് (കേണല്‍, കരസേന).
