ന്യൂഡല്ഹി : ടാറ്റ ഗ്രൂപ്പിന്റെ ഉടമസ്ഥതയിലുള്ള എയര് ഇന്ത്യക്കെതിരെ വീണ്ടും ഗുരുതര ആരോപണം. ഡല്ഹി വിമാനത്താവളത്തില് മൂന്ന് വിദേശ പൗരന്മാര് നിര്ബന്ധിത ഇമിഗ്രേഷന് പരിശോധന പൂര്ത്തിയാക്കാതെ ഇന്ത്യ വിട്ട സംഭവത്തില് എയര് ഇന്ത്യ സിഇഒയെ കേന്ദ്ര സര്ക്കാര് വിളിച്ചുവരുത്തി വിശദീകരണം തേടി. സംഭവത്തില് സിവില് ഏവിയേഷന് മന്ത്രാലയം എയര് ഇന്ത്യയ്ക്ക് കാരണം കാണിക്കല് നോട്ടീസും നല്കിയിട്ടുണ്ട്. സെപ്റ്റംബര് നാലിനാണ് സംഭവം നടന്നത്. അമൃത്സറില് നിന്ന് എയര് ഇന്ത്യയുടെ ആഭ്യന്തര വിമാനത്തില് ഡല്ഹിയിലെത്തിയ മൂന്ന് വിദേശ പൗരന്മാരാണ് പിന്നീട് ആവശ്യമായ ഇമിഗ്രേഷന് നടപടികള് പൂര്ത്തിയാക്കാതെ അന്താരാഷ്ട്ര വിമാനത്തില് യാത്ര ചെയ്തത്.
ഡല്ഹിയില് നിന്ന് മ്യൂണിക്കിലേക്ക് പോകുന്ന ലുഫ്താന്സ വിമാനത്തിലാണ് ഇവര് കയറിയത്. എന്നാല് ഇന്ത്യയില് നിന്ന് വിദേശത്തേക്ക് പോകുന്ന യാത്രക്കാര് നിര്ബന്ധമായും പൂര്ത്തിയാക്കേണ്ട ഡിപ്പാര്ച്ചര് ഇമിഗ്രേഷന് ക്ലിയറന്സ് ഇവര് നേടിയിരുന്നില്ല എന്നാണ് അധികൃതരുടെ കണ്ടെത്തല്. അമൃത്സറില് നിന്ന് ഡല്ഹിയിലെത്തിയ യാത്രക്കാര്ക്ക് തുടര്യാത്രയ്ക്കുള്ള ബോര്ഡിങ് പാസ് നല്കിയിരുന്നു. എന്നാല് ഡല്ഹി വിമാനത്താവളത്തില് ഇമിഗ്രേഷന് പരിശോധനയ്ക്കായി പോകേണ്ടതിനുപകരം ഇവര് നേരിട്ട് അന്താരാഷ്ട്ര ഡിപ്പാര്ച്ചര് മേഖലയിലേക്ക് എത്തുകയും തുടര്ന്ന് മ്യൂണിക്കിലേക്കുള്ള വിമാനത്തില് കയറുകയുമായിരുന്നു എന്നാണ് റിപ്പോര്ട്ട്. സംഭവം വിമാനത്താവളത്തിലെ പാസഞ്ചര് ഹാന്ഡ്ലിങ് സംവിധാനത്തിലുണ്ടായ ഗുരുതര വീഴ്ചയായാണ് അധികൃതര് കാണുന്നത്. എയര് ഇന്ത്യ ജീവനക്കാരുടെയും ഗ്രൗണ്ട് ഹാന്ഡ്ലിങ് ഏജന്സിയുടെയും നടപടികളടക്കം പരിശോധിക്കുന്നുണ്ട്
സംഭവത്തില് എയര് ഇന്ത്യയുടെ ആഭ്യന്തര സംവിധാനങ്ങള് എങ്ങനെ പ്രവര്ത്തിച്ചു, ഇമിഗ്രേഷന് പരിശോധന പൂര്ത്തിയാക്കാത്ത യാത്രക്കാര് എങ്ങനെയാണ് അന്താരാഷ്ട്ര ഡിപ്പാര്ച്ചര് മേഖലയിലെത്തിയത്, ബന്ധപ്പെട്ട ജീവനക്കാര് എന്ത് നടപടികളാണ് സ്വീകരിച്ചത് തുടങ്ങിയ കാര്യങ്ങളില് വിശദീകരണം നല്കാന് അധികൃതര് ആവശ്യപ്പെട്ടിട്ടുണ്ട്. ഏഴ് ദിവസത്തിനകം വിശദീകരണം നല്കണമെന്നാണ് എയര് ഇന്ത്യയോട് ആവശ്യപ്പെട്ടിരിക്കുന്നത്. സംഭവത്തിന്റെ പശ്ചാത്തലത്തില് വിമാനത്താവളത്തിലെ സുരക്ഷാ സംവിധാനങ്ങളും യാത്രക്കാരുടെ കൈകാര്യം ചെയ്യല് നടപടികളും കൂടുതല് കര്ശനമായി പരിശോധിക്കാനും അധികൃതര് നീക്കം ആരംഭിച്ചിട്ടുണ്ട്. ദേശീയ സുരക്ഷയുമായി നേരിട്ട് ബന്ധപ്പെട്ട വിഷയമായതിനാല് സംഭവത്തെ ഗുരുതരമായ സുരക്ഷാ-ഇമിഗ്രേഷന് വീഴ്ചയായാണ് സര്ക്കാര് കാണുന്നത്. എയര് ഇന്ത്യയുടെ സിഇഒയോട് നേരിട്ട് വിശദീകരണം തേടിയത് സംഭവത്തിന്റെ ഗൗരവം വ്യക്തമാക്കുന്നതാണ്.
