കൊച്ചി: കെഎസ്ആര്ടിസി ബസില് യുവനടിയോട് മോശമായി പെരുമാറിയ സംഭവത്തില് യുവാവിനെതിരെ കേസെടുത്ത് പോലീസ്. സഹയാത്രികനായ കോഴിക്കോട് സ്വദേശി സവാദിനെതിരെയാണ് നെടുമ്പാശേരി പോലീസ് കേസെടുത്തത്. കോടതിയില് ഹാജരാക്കിയ പ്രതിയെ റിമാന്ഡ് ചെയ്തു. കഴിഞ്ഞ ദിവസം അങ്കമാലിയില് വെച്ചാണ് ചലച്ചിത്രതാരവും മോഡലുമായ യുവതിക്ക് ദുരനുഭവമുണ്ടായത്. ചൊവ്വാഴ്ച ഉച്ചയോടെ ദേശീയപാതയില് അത്താണിയിലാണ് സംഭവം.
തൃശൂരില് നിന്നും എറണാകുളത്തേക്ക് ഷൂട്ടിംഗിനായി പുറപ്പെട്ടപ്പോഴാണ് തനിക്ക് സഹയാത്രികന്റെ അടുത്ത് നിന്നും മോശമായ പെരുമാറ്റം ഉണ്ടായതെന്ന് യുവനടി തന്റെ സോഷ്യല് മീഡിയ അക്കൌണ്ടില് പോസ്റ്റ് ചെയ്ത വീഡിയോയില് പറയുന്നു. അങ്കമാലിയില് നിന്നുമാണ് യുവാവ് ബസില് കയറുന്നത്. തന്റെ അടുത്തായി വന്നിരുന്നു, അപ്പുറത്ത് മറ്റൊരു യാത്രക്കാരിയുണ്ടായിരുന്നു. ബസില് കയറിയതുമുതല് ഇയാള് ഒരു കൈകൊണ്ട് ശരീരത്ത് ഉരസാന് തുടങ്ങി. കുറച്ച് കഴിഞ്ഞതോടെ പാന്റിന്റെ സിബ്ബ് തുറന്ന് നഗ്നത പ്രദര്ശിപ്പിക്കുയും സ്വയം ഭോഗം ചെയ്യുകയും ചെയ്തു. ഇത് ശ്രദ്ധയില് പെട്ടതോടെ യുവാവറിയാതെ മൊബൈലില് വീഡിയോ എടുത്ത് ചോദ്യം ചെയ്തു- യുവതി പറയുന്നു.