ചെന്നൈ: കലാക്ഷേത്രയിലെ പീഡന ആരോപണത്തില് അന്വേഷണ സമിതി രൂപീകരിക്കാനൊരുങ്ങി ഫൗണ്ടേഷന്. അസിസ്റ്റന്റ് പ്രൊഫസര് ഹരി പത്മനും മറ്റ് മൂന്ന് അധ്യാപകര്ക്കുമെതിരെ ഉയര്ന്ന ലൈംഗികാരോപണങ്ങള് അന്വേഷിക്കാനാണ് സ്വതന്ത്ര അന്വേഷണ സമിതി രൂപീകരിച്ചത്. ജസ്റ്റിസ് (റിട്ട) കെ കണ്ണന്, മുന് ഡിജിപി ലെത്തികാ ശരണ്, ഡോ. ശോഭ വര്ത്തമാന് എന്നിവരുടെ നേതൃത്വത്തിലുള്ള അന്വേഷണ സമിതിയാണ് രുക്മിണി ദേവി കോളേജ് ഓഫ് ഫൈന് ആര്ട്സിലെ വിദ്യാര്ത്ഥികളുടെ ആരോപണങ്ങള് അന്വേഷിക്കുക.
കലാക്ഷേത്രയിലെ വിദ്യാര്ത്ഥിനികളുടെ പീഡന പരാതിയില് മലയാളി അധ്യാപകന് അറസ്റ്റിലായിരുന്നു. രുഗ്മിണിദേവി കോളേജ് ഓഫ് ഫൈന് ആര്ട്സ് കോളേജിലെ അസിസ്റ്റന്റ് പ്രൊഫസറായ ഹരി പത്മനെയാണ് അറസ്റ്റ് ചെയ്തത്. കോളേജിലെ പൂര്വ്വ വിദ്യാര്ത്ഥിനി നല്കിയ പരാതിയുടെ അടിസ്ഥാനത്തിലാണ് അറസ്റ്റ് രേഖപ്പെടുത്തിയത്. അതേസമയം ഹരി പത്മനും മൂന്ന് അധ്യാപകര്ക്കും എതിരെ നടപടി ആവശ്യപ്പെട്ട് വിദ്യാര്ത്ഥികള് ക്യാമ്പസില് പ്രതിഷേധ പ്രകടനം നടത്തി. ചെന്നൈ പോലീസ് അറസ്റ്റ് ചെയ്ത ഹരി പത്മനെ അന്വേഷണ വിധേയമായി സസ്പെന്ഡ് ചെയ്തു.
