പത്തനംതിട്ട: ശബരിമല മാസ്റ്റര്പ്ലാനില് വിഭാവനം ചെയ്ത പ്രവര്ത്തനങ്ങള് ഏകോപിപ്പിച്ച് നടപ്പിലാക്കുന്നതിന് ശബരിമല വികസന അതോറിറ്റി രൂപീകരിക്കാന് സര്ക്കാര് തീരുമാനം. മുഖ്യമന്ത്രിയുടെ അധ്യക്ഷതയില് ചേര്ന്ന ഉന്നതതല യോഗത്തിലാണ് തീരുമാനം. വെര്ച്യുല് ക്യു ബുക്കിങ് മുതല് പ്രസാദവിതരണം വരെയുള്ള മുഴുവന് കാര്യങ്ങളും ഡിജിറ്റലൈസ് ചെയ്യാന് സോഫ്റ്റ്വെയര് നിര്മിക്കും. സംഭാവനകള്ക്കായി ഡിജിറ്റല് സംവിധാനം ഒരുക്കും. തമിഴ്നാട്, കര്ണാടക, ആന്ധ്രപ്രദേശ്, തെലുങ്കാന തുടങ്ങിയ സംസ്ഥാനങ്ങള്ക്ക് നിലയ്ക്കലില് ഗസ്റ്റ്ഹൗസ് സ്ഥാപിക്കാന് സ്ഥലം വിട്ടുനല്കുന്നത് ആലോചിക്കാനും തീരുമാനിച്ചു. പമ്പാനദിയിലെ കോളിഫോം ബാക്ടീരിയ ഉള്പ്പെടെയുള്ള മാലിന്യങ്ങളുടെ കൃത്യമായ ഉറവിടം കണ്ടെത്തി തടയുന്നതിന് പരിശോധനകള് നടത്തണമെന്നും മുഖ്യമന്ത്രി യോഗത്തില് നിര്ദ്ദേശിച്ചു.
സന്നിധാനത്തെ വെടിവഴിപാട്, കൊപ്ര ശേഖരിക്കല് മുതലായ എല്ലാ ഇടപാടുകളും ഇ-ടെണ്ടര് നടപടികളിലൂടെ പൂര്ത്തീകരിക്കണമെന്നും മുഖ്യമന്ത്രി നിര്ദ്ദേശിച്ചു. മന്ത്രിമാരായ കെ. രാധാകൃഷ്ണന്, കെ. രാജന്, വീണാ ജോര്ജ്ജ്, ആന്റണി രാജു , ചീഫ് സെക്രട്ടറി, സംസ്ഥാന പോലീസ് മേധാവി അടക്കമുള്ള ഉന്നത ഉദ്യോഗസ്ഥര് യോഗത്തില് പങ്കെടുത്തു.
