ആലപ്പുഴ : എസ്.ഡി.പി.ഐ സംസ്ഥാന സെക്രട്ടറി അഡ്വ. കെ.എസ്. ഷാന്‍റെ കൊലപാതക കേസില്‍ ആര്‍.എസ്.എസ് ആലുവ ജില്ല പ്രചാരക് അറസ്റ്റില്‍. മലപ്പുറം പൊന്നാനി കാലടി പഞ്ചായത്ത് 13ാംവാര്‍ഡില്‍ കുറുങ്ങാടത്ത് കെ.വി. അനീഷിനെയാണ് (39) ആലപ്പുഴ ജില്ല ക്രൈം ബ്രാഞ്ച് ഡിവൈ.എസ്.പി കെ.വി. ബെന്നിയുടെ നേതൃത്വത്തില്‍ അറസ്റ്റ് ചെയ്തത്.
ഷാനെ കൊലപെടുത്താന്‍ ഗൂഢാലോചന നടത്തിയ ആര്‍.എസ്.എസ് നേതാക്കള്‍ക്ക് ആലുവയിലെ ആര്‍.എസ്.എസ് കാര്യാലയത്തില്‍ ഒളിത്താവളം ഒരുക്കിയതടക്കമുള്ള സഹായം നല്‍കിയതിനാണ് ഇയാള്‍ പിടിയിലായത്. അന്വേഷണ സംഘം വിളിച്ചുവരുത്തിയശേഷം ചോദ്യം ചെയ്യലിനൊടുവിലാണ് അറസ്റ്റ് രേഖപ്പെടുത്തിയത്. ഇതോടെ, ഷാന്‍ വധക്കേസില്‍ അറസ്റ്റിലായവരുടെ എണ്ണം 15 ആയി. ഗൂഢാലോചനയുമായി ബന്ധപ്പെട്ട് കൂടുതല്‍പേര്‍ പിടിയിലാകുമെന്ന സൂചനയും പോലീസ് നല്‍കുന്നുണ്ട്.
ഷാന്‍, രഞ്ജിത്ത് വധവുമായി ബന്ധപ്പെട്ട അന്വേഷണം ഉന്നതരിലേക്കും നീങ്ങുന്നുണ്ട്. കണ്ണൂരില്‍നിന്നുള്ള ആര്‍.എസ്.എസ് നേതാവ് വത്സന്‍ തില്ലങ്കേരി ജില്ലയിലെത്തിയ അതേദിവസമാണ് ഷാന്‍റെ കൊലപാതകം നടന്നുവെന്നതടക്കമുള്ള കാര്യവും പൊപോലീസ് പരിശോധിക്കും. അറസ്റ്റിലായ ആര്‍.എസ്.എസ് ജില്ല പ്രചാരകില്‍നിന്ന് കൂടുതല്‍ വിവരങ്ങള്‍ കിട്ടുമെന്ന പ്രതീക്ഷയുണ്ട്.
കൊലപാതകത്തില്‍ നേരിട്ട് പങ്കെടുത്തവരെ കണ്ടെത്തുന്നതിനൊപ്പം രാഷ്ട്രീയ കൊലപാതകത്തിന്‍റെ ഗൂഢാലോചനയിലും ആസൂത്രണത്തിലും പങ്കാളികളായവരെ നിയമത്തിന് മുന്നില്‍ കൊണ്ടുവരാനുള്ള നീക്കവും പോലീസ് ആരംഭിച്ചിട്ടുണ്ട്. കൃത്യത്തില്‍ പങ്കെടുത്തവരും ഇവര്‍ക്ക് സഹായം നല്‍കിയവരെയും പിടികൂടാന്‍ പഴുതടച്ച അന്വേഷണമാണ് നടത്തുന്നത്. ഡിസംബര്‍ 18ന് രാത്രി 7.30ന് മണ്ണഞ്ചേരി-പൊന്നാട് റോഡില്‍ കുപ്പേഴം ജങ്ഷനിലാണ് വീട്ടിലേക്ക് സ്കൂട്ടറില്‍ പോവുകയായിരുന്ന എസ്.ഡി.പി.ഐ നേതാവ് അഡ്വ. കെ.എസ്. ഷാനെ (38) പിന്നില്‍നിന്നെത്തിയ കാര്‍ ഇടിച്ചുവീഴ്ത്തിയശേഷം അഞ്ചംഗസംഘം വെട്ടിക്കൊലപ്പെടുത്തിയത്.
കഴിഞ്ഞ ഫെബ്രുവരിയില്‍ വയലാറില്‍ ആര്‍.എസ്.എസ് പ്രവര്‍ത്തകന്‍ നന്ദുകൃഷ്ണയെ കൊലപ്പെടുത്തിയതിന്‍റെ പ്രതികാരമായാണ്‌ ഷാനെ വധിച്ചതെന്ന്‌ പോലീസ് കണ്ടെത്തിയിട്ടുണ്ട്‌. ഇതിനായി മാസങ്ങളുടെ ഗൂഢാലോചനയും നടന്നു. ഷാന്‍ വധക്കേസില്‍ ആദ്യം അറസ്റ്റിലായ രാജേന്ദ്രപ്രസാദും രതീഷും ആര്‍.എസ്.എസ് കാര്യാലയത്തില്‍ ജില്ല പ്രചാരകിന്‍റെ മുറിയില്‍ നടന്ന ഗൂഢാലോചനയില്‍ പങ്കെടുത്തുവെന്ന വിവരവും പോലീസിന് ലഭിച്ചിട്ടുണ്ട്.
