ഹരിപ്പാട് : കുമാരപുരത്ത് ആര്‍.എസ്.എസ് പ്രവര്‍ത്തകന്‍ ശരത് ചന്ദ്രനെ കുത്തിക്കൊലപ്പെടുത്തിയ കേസില്‍ മുഖ്യപ്രതി പിടിയില്‍. കൊലപാതക ശേഷം ഒളിവില്‍ പോയ കുമാരപുരം പൊത്തപ്പള്ളി തെക്ക് ചെട്ടിശ്ശേരില്‍ വടക്കേതില്‍ നന്ദു പ്രകാശിനെയാണ് (കരിനന്ദു-23) എറണാകുളത്തുനിന്നും പോലീസ് അറസ്റ്റ് ചെയ്തത്. കേസില്‍ ആറുപേര്‍ നേരത്തെ പോലീസ് പിടിയിലായിരുന്നു. ഇവര്‍ റിമാന്‍ഡിലാണ്. കുമാരപുരം പൊത്തപ്പള്ളി തെക്ക് പീടികയില്‍ വീട്ടില്‍ ടോം പി. തോമസ് (26), കുമാരപുരം പൊത്തപ്പള്ളി കടൂര്‍ വീട്ടില്‍ വിഷ്ണു (29), തൃക്കുന്നപ്പുഴ കിഴക്കേക്കര വടക്ക് നിഷ ഭവനത്തില്‍ കിഷോര്‍ കുമാര്‍ (കൊച്ചി രാജാവ് -34), കുമാരപുരം താമല്ലാക്കല്‍ പടന്നയില്‍ കിഴക്കതില്‍ ശിവകുമാര്‍ (25), കുമാരപുരം എരിക്കാവ് കൊച്ചു പുത്തന്‍പറമ്പില്‍ സുമേഷ് (33), താമല്ലാക്കല്‍ പുളിമൂട്ടില്‍ സൂരജ് (20) എന്നിവരെയാണ് റിമാന്‍ഡ് ചെയ്തത്.
കേസുമായി ബന്ധപ്പെട്ട് രണ്ടുപേര്‍ കൂടി പിടിയിലാകാനുണ്ടെന്ന് പോലീസ് പറഞ്ഞു. തൃക്കുന്നപ്പുഴ കിഴക്കേക്കര വടക്ക് വലിയപറമ്പ് ഇടപ്പള്ളി തോപ്പില്‍ ശരത് ഭവനത്തില്‍ ചന്ദ്രന്‍റെ മകന്‍ ശരത് ചന്ദ്രനെ (അക്കു -26) ആണ് ബുധനാഴ്ച രാത്രി 12ഓടെ അക്രമിസംഘം കുത്തിക്കൊന്നത്. ശരത്തിന്‍റെ സുഹൃത്ത് പുത്തന്‍വീട്ടില്‍ മനോജിന് (24) പരിക്കേറ്റിരുന്നു.കാട്ടില്‍ മാര്‍ക്കറ്റ് പുത്തന്‍കരി ക്ഷേത്രത്തിലെ താലപ്പൊലി ഘോഷയാത്രക്കിടെ ഉണ്ടായ തര്‍ക്കമാണ് കൊലപാതകത്തില്‍ കലാശിച്ചതെന്ന് പോലീസ് പറഞ്ഞു. പ്രതികളെല്ലാം ഒട്ടേറെ ക്രിമിനല്‍ കേസുകളില്‍ പ്രതികളാണെന്നും സംഭവം രാഷ്ട്രീയ കൊലപാതകമല്ലെന്നും പോലീസ് വ്യക്തമാക്കിയിരുന്നു. ഹരിപ്പാട് സി.ഐ ബിജു വി. നായരുടെ നേതൃത്വത്തില്‍ എസ്.ഐ രാജ്കുമാര്‍, പോലീസ് ഉദ്യോഗസ്ഥരായ നിഷാദ്, നിസാം, സിദ്ദീഖ്, പ്രേം, വിനോദ്, പ്രവീണ്‍ എന്നിവരടങ്ങിയ സംഘമാണ് പ്രതിയെ പിടികൂടിയത്.
