കോഴിക്കോട്: കുടുംബ ബന്ധം തകര്ക്കാന് ശ്രമിക്കുന്നുവെന്ന പരാതിയില് എസ് ഐക്ക് സസ്പെന്ഷന്. കല്പ്പറ്റ സ്റ്റേഷനിലെ എസ് ഐ അബ്ദുള് സമദിനെയാണ് അച്ചടക്ക ലംഘനം നടത്തിയെന്ന് കാട്ടി കണ്ണൂര് റേഞ്ച് ഡി ഐ ജി സസ്പെന്ഡ് ചെയ്തത്. ഇയാള്ക്കെതിരെ വകുപ്പു തല അന്വേഷണം നടത്താനും ഉത്തരവിട്ടിട്ടുണ്ട്. ഭാര്യയുമായുള്ള ബന്ധം ചോദ്യം ചെയ്തതിന് കള്ളക്കേസില് കുടുക്കിയെന്നായിരുന്നു എടച്ചേരിയിലെ മുന് എസ് ഐ ആയിരുന്ന അബ്ദുള് സമദിനെതിരായി എടച്ചേരി സ്വദേശി നിജേഷും മക്കളും ജില്ലാ പോലീസ് മേധാവിക്ക് നല്കിയ പരാതി.
ചെയ്യാത്ത തെറ്റിന് 15 ദിവസം ജയിലില് കിടക്കേണ്ടി വന്നെന്ന് നിജേഷ് പറയുന്നു. ഭാര്യയെ കൊണ്ട് പരാതി എഴുതി വാങ്ങിയത് സമദായിരുന്നു. ഇവര് തമ്മിലെ ബന്ധം ചോദ്യം ചെയ്താല് വീണ്ടും കേസില് കുടുക്കുമെന്ന് എസ് ഐ ഭീഷണിപ്പെടുത്തിയെന്നും നിജേഷ് പറയുന്നു. നിജേഷിന്റെ പരാതിയില് നേരത്തെ സമദിനെ കല്പ്പറ്റ സ്റ്റേഷനിലേക്ക് സ്ഥലം മാറ്റിയിരുന്നു. ഇതിനു ശേഷവും ഭീഷണി തുടരുന്നു എന്നായിരുന്നു പരാതി.
