കൊച്ചി: സിദ്ധാര്‍ഥന്‍റെ മരണത്തില്‍ സിബിഐ അന്വേഷണം ഏറ്റെടുക്കണമെന്ന് ആവശ്യപ്പെട്ട് ഉടന്‍ കേന്ദ്ര സര്‍ക്കാര്‍ വിജ്ഞാപനം ഇറക്കണമെന്ന് ഹൈക്കോടതി. സിദ്ധാര്‍ഥന്‍റെ പിതാവ് നല്‍കിയ ഹര്‍ജിയിലാണ് ഹൈക്കോടതിയുടെ ഇടക്കാല ഉത്തരവ്. കേസ് സിബിഐ ഉടന്‍ ഏറ്റെടുക്കാന്‍ നടപടി വേണമെന്ന് ആവശ്യപ്പെട്ടാണ് സിദ്ധാര്‍ഥന്‍റെ പിതാവ് കോടതിയെ സമീപിച്ചത്. ജസ്റ്റീസ് ബെച്ചു കുര്യന്‍ തോമസാണ് ഹര്‍ജി പരിഗണിച്ചിരിക്കുന്നത്. സിബിഐ അന്വേഷണം ഏറ്റെടുക്കാന്‍ വൈകുന്ന ഓരോ നിമിഷവും കേസിനെ ബാധിക്കുമെന്ന് കോടതി നിരീക്ഷിച്ചു. അന്വേഷണത്തില്‍ കാലതാമസമുണ്ടായാല്‍ ഇരയ്ക്ക് നീതി ലഭിച്ചെന്ന് വരില്ല. പ്രതികള്‍ രക്ഷപെടാനുള്ള സാഹര്യം സൃഷ്ടിക്കപ്പെടുമെന്നും കോടതി വ്യക്തമാക്കി.
മാര്‍ച്ച് ഒമ്പതിന് സിബിഐ അന്വേഷണത്തിന് ഉത്തരവിട്ടിട്ടും രേഖകള്‍ കൈമാറാന്‍ കാലതാമസമുണ്ടായത് എന്തുകൊണ്ടാണെന്ന് സംസ്ഥാന സര്‍ക്കാരിനോട് കോടതി ചോദിച്ചു. മാര്‍ച്ച് 26ന് തന്നെ രേഖകള്‍ കൈമാറിയതായി സര്‍ക്കാര്‍ അഭിഭാഷകന്‍ കോടതിയെ അറിയിച്ചു. ഉദ്യോഗസ്ഥതലത്തിലുണ്ടായ പിഴവാണ് കാലതാമസമുണ്ടാകാന്‍ കാരണം. അതില്‍ സര്‍ക്കാര്‍ നടപടി സ്വീകരിച്ചിട്ടുണ്ടെന്നും അഭിഭാഷകന്‍ പറഞ്ഞു.
