ന്യൂഡെല്ഹി: ഡെല്ഹിയില് കോവിഡ് വാക്സിന് സ്വീകരിച്ച 52 പേര്ക്ക് പാര്ശ്വഫലങ്ങള് റിപ്പോര്ട്ട് ചെയ്തു. ഇതില് ഒരാളുടെ നില ഗുരുതരമാണ്. മറ്റുള്ളവര് നിരീക്ഷണ സമയത്ത് നേരിട്ട ചെറിയ രീതിയിലുള്ള അസ്വസ്ഥതകളെ തരണം ചെയ്തുവെന്നാണ് എയിംസ് അധികൃതര് വ്യക്തമാക്കുന്നത്. ചെറിയ രീതിയിലുള്ള പാര്ശ്വഫലങ്ങള് സ്വാഭാവികമാണെന്നാണ് അധികൃതരുടെ നിഗമനം.
രാജ്യത്ത് ശനിയാഴ്ച ആരംഭിച്ച കോവിഡ് വാക്സിനേഷന് 1,65,714 പേരാണ് സ്വീകരിച്ചത്. ഇതില് ഏറ്റവും കൂടുതല് പേര് വാക്സിനെടുത്തത് യുപിയിലാണ്. ഡെല്ഹിയില് റിപ്പോര്ട്ട് ചെയ്തതല്ലാതെ രാജ്യത്തെ മറ്റ് സംസ്ഥാനങ്ങളിലൊന്നും വാക്സിന് സ്വീകരിച്ചവര്ക്ക് പാര്ശ്വ ഫലങ്ങള് അനുഭവപ്പെട്ടതായി നിലവില് റിപ്പോര്ട്ട് ചെയ്യപ്പെട്ടിട്ടില്ല.
ഡെല്ഹിയിലെ സംഭവത്തിന് കാരണം സാങ്കേതിക തകരാറുകള് ആണെന്നാണ് പ്രാഥമിക വിലയിരുത്തല്. സംഭവത്തോട് പ്രതികരിച്ച ഡെല്ഹി മുഖ്യമന്ത്രി അരവിന്ദ് കെജ്രിവാള് കിംവദന്തികളില് വിശ്വസിക്കരുതെന്നും ; ആരോഗ്യ പ്രവര്ത്തകര് പറയുന്നത് കേള്ക്കണമെന്നും അദ്ദേഹം ജനങ്ങളോട് ആവശ്യപ്പെട്ടു.
