ഗുരുവായൂര്: തോട്ടം ശിവകരന് നമ്പൂതിരി ഗുരുവായൂര് ക്ഷേത്രം പുതിയ മേല്ശാന്തി. ഇന്നു ഉച്ചപൂജയ്ക്ക് ശേഷം ക്ഷേത്രം തന്ത്രി പി.സി.ദിനേശന് നമ്പൂതിരിപ്പാടിന്റെ സാന്നിധ്യത്തില് നടത്തിയ നറുക്കെടുപ്പിലാണ് പുതിയ മേല്ശാന്തിയെ തിരഞ്ഞെടുത്തത്. 40 പേരാണ് മേല്ശാന്തിക്കായി അപേക്ഷ സമര്പ്പിച്ചത് അതില് 33പേര് കൂടിക്കാഴ്ചക്കായി ഹാജരായി. യോഗ്യരായ 28 പേരില് നിന്നും നറുക്കിട്ടെടുത്താണ് പുതിയ മേല്ശാന്തിയെ തെരഞ്ഞെടുത്തത്. ഈ മാസം 31 ന് ഇപ്പോഴത്തെ മേല്ശാന്തിയുടെ കാലാവധി പൂര്ത്തിയാക്കി ഏപ്രില് 1 മുതല് പുതിയ മേല്ശാന്തി ചുമതലയേല്ക്കും.
പുതിയ മേല്ശാന്തിയെ നറുക്കെടുക്കുന്നത് സാധാരണ നിലവിലുള്ള മേല്ശാന്തി കക്കാട് കിരണ് ആനന്ദാണ്. എന്നാല് നറുക്കെടുപ്പ് ദിവസം അദ്ദേഹത്തിന് 10 ദിവസത്തെ വാലായ്മ വന്നതിനാല് ഉച്ചപൂജ നിര്വ്വഹിച്ച ക്ഷേത്രം ഓതിക്കനാണ് നറുക്കെടുത്തത്. ദേവസ്വം ചെയര്മാന് ഡോ.വി കെ വിജയന്, ഭരണ സമിതി അംഗങ്ങളായ മല്ലിശ്ശേരി പരമേശ്വരന് നമ്പൂതിരിപ്പാട്, സി മനോജ്, കെ.ആര് ഗോപിനാഥ്, വി.ജി.രവീന്ദ്രന് അഡ്മിനിസ്ട്രേറ്റര് കെ.പി.വിനയന് എന്നിവര് പങ്കെടുത്തു.
