ചാത്തന്നൂർ: കൊല്ലം പരവൂരിൽ കുറ്റിക്കാട്ടിലാണ് അസ്ഥികൂടം കണ്ടെത്തിയ സംഭവത്തിൽ കൂടുതൽ വിവരങ്ങൾ പുറത്ത്. മരത്തിൽ തൂങ്ങിയ നിലയിൽ കണ്ടെത്തിയ മൃതദേഹം തിരിച്ചറിഞ്ഞു. നെടുങ്ങോലം മുതലക്കുളം സന്തോഷ് ഭവനിൽ വിഘ്നേഷാണ് (21) മരിച്ചത്. മൃതദേഹത്തിലെ വസ്ത്രങ്ങൾ കുടുംബാംഗങ്ങൾ തിരിച്ചറിഞ്ഞു. നെടുങ്ങോലം ഒഴുകുപാറ പോറ്റുവിള തൂമ്പ് പമ്പ് ഹൗസിനു സമീപമാണ് ജീർണിച്ച് അസ്ഥികൾ മാത്രമായ മൃതദേഹം കണ്ടെത്തിയത്.
മൂന്നുമാസം പഴക്കമുള്ള മൃതദേഹം പൂർണമായും ദ്രവിച്ച നിലയിലായിരുന്നു. അസ്ഥികൂട ഭാഗങ്ങളാണ് കണ്ടെത്തിയത്. ട്രാക്ക് സ്യൂട്ടിൽ മരക്കൊമ്പിൽ തൂങ്ങിയ നിലയിലായിരുന്നു. മൂന്നുമാസം മുമ്പ് ചാത്തന്നൂർ പോലീസ് സ്റ്റേഷനിൽ രജിസ്റ്റർചെയ്ത കേസിൽ പ്രതിയായ വിഘ്നേഷിനായി പോലീസ് അന്വേഷണം നടത്തിവരികയായിരുന്നു.
