ന്യൂഡല്ഹി : കോണ്ഗ്രസ് നേതാവ് രാഹുല് ഗാന്ധിയുടെ വയനാട് ലോക്സഭാ മണ്ഡലത്തില് നിന്നുള്ള തെരഞ്ഞെടുപ്പ് റദ്ദാക്കണമെന്നാവശ്യപ്പെട്ട് സരിത എസ് നായര് സമര്പ്പിച്ച ഹര്ജി സുപ്രീം കോടതി ഇന്ന് പരിഗണിക്കും. ചീഫ് ജസ്റ്റിസ് എസ് എ ബോബ്ഡെയുടെ അധ്യക്ഷതയിലുള്ള മൂന്നംഗ ബെഞ്ചാണ് പരിഗണിക്കുന്നത്.
തന്റെ നാമനിര്ദേശ പത്രിക തള്ളിയ വരണാധികാരിയുടെ നടപടി ചോദ്യം ചെയ്താണ് സരിത സുപ്രീം കോടതിയെ സമീപിച്ചിരിക്കുന്നത്. വയനാട് ലോക്സഭാ മണ്ഡലത്തില് പുതുതായി തെരഞ്ഞെടുപ്പ് നടത്തണമെന്നും സരിത ഹര്ജിയില് ആവശ്യപ്പെടുന്നു.
ക്രിമിനല് കേസില് രണ്ട് വര്ഷത്തില് അധികം ശിക്ഷ ലഭിച്ചിട്ടുണ്ട് എങ്കില് ജനപ്രാതിനിധ്യ നിയമത്തിലെ എട്ട് (3) വകുപ്പ് പ്രകാരം നാമനിര്ദേശ പത്രിക തള്ളാം. സോളാര് ഇടപാടുമായി ബന്ധപ്പെട്ട കേസില് പെരുമ്പാവൂര് ജുഡീഷ്യന് ഫസ്റ്റ് ക്ളാസ് മജിസ്ട്രേറ്റ് കോടതി സരിതക്ക് മൂന്ന് വര്ഷത്തെ തടവ് ശിക്ഷയും പതിനായിരം രൂപ പിഴയും വിധിച്ചിരുന്നു. മറ്റൊരു കേസില് പത്തനംതിട്ട ജുഡീഷ്യന് ഫസ്റ്റ് ക്ലാസ് മജിസ്ട്രേറ്റ് കോടതി 45 ലക്ഷം രൂപ പിഴയും വിധിച്ചിരുന്നു. ശിക്ഷ മേല്ക്കോടതി തടഞ്ഞിട്ടില്ലെന്ന് ചൂണ്ടിക്കാട്ടിയാണ് വയനാട് ലോക്സഭാ മണ്ഡലത്തില് നിന്ന് സരിത എസ് നായര് നല്കിയ നാമനിര്ദേശ പത്രിക വരണാധികാരി തള്ളിയത്.
എന്നാല് ശിക്ഷ എറണാകുളം സെഷന്സ് കോടതിയും ഹൈക്കോടതിയും സ്റ്റേ ചെയ്തിരുന്നു എന്നും അതിനാല് തെരഞ്ഞെടുപ്പില് മത്സരിക്കുന്നതില് ജനപ്രാതിനിധ്യ നിയമത്തിലെ 8(3) വകുപ്പ് പ്രകാരം വിലക്ക് ഉണ്ടായിരുന്നില്ല എന്നും സരിത സുപ്രീം കോടതിയില് സമര്പ്പിച്ച ഹര്ജിയില് പറയുന്നു. മാത്രമല്ല അമേഠി ലോക്സഭാ മണ്ഡലത്തില് തന്റെ നാമനിര്ദേശ പത്രിക വരണാധികാരി സ്വീകരിച്ചിരുന്നെന്നും സരിത ഹരജിയില് പറയുന്നു.
