കൊല്ക്കത്ത : കോവിഡ് ബാധിച്ച് ഒക്ടോബര് 6ന് ആശുപത്രിയില് പ്രവേശിപ്പിച്ച ബംഗാളി നടന് സൗമിത്ര ചാറ്റര്ജിയുടെ നില ഗുരുതരം. മരുന്നുകളോട് പ്രതികരിക്കാതെ വന്നതോടെയാണ് ആരോഗ്യനില മോശമായത്. അവയവങ്ങള് നല്ല രീതിയില് പ്രവര്ത്തിക്കുന്നുണ്ട് പ്ലേറ്റ്ലെറ്റിന്റെ എണ്ണം കുറയുകയും രക്തത്തിലെ യൂറിയയുടെയും സോഡിയത്തിന്റെയും അളവ് വര്ദ്ധിക്കുകയും ചെയ്തുവെന്ന് അദ്ദേഹത്തെ ചികിത്സിക്കുന്ന ഡോ. അരിന്ദം കാര് പറഞ്ഞു.
അദ്ദേഹത്തിന്റെ ശ്വാസകോശത്തിന്റെ നിലയും രക്തസമ്മര്ദ്ദവും ഭേദപ്പെട്ട് പ്രവര്ത്തിക്കുന്നുണ്ടെങ്കിലും ഇപ്പോഴും കടുത്ത ആശങ്ക തുടരുന്നതായി ഡോ. അരിന്ദം കാര് അറിയിച്ചു. കോവിഡ് എന്സെഫലോപ്പതി (തലച്ചോറിന് നാശം സംഭവിക്കുന്ന അവസ്ഥ, ഇതോടെ ഓര്മ തകരാറുണ്ടാകും. സംസാരിക്കാനും ഭക്ഷണം കഴിക്കാനുമൊക്കെ ബുദ്ധിമുട്ടുണ്ടാകും) വര്ധിക്കുകയാണെന്നാണ് നിഗമനം. കഴിഞ്ഞയാഴ്ച നടത്തിയ പരിശോധനയില് ഫലം നെഗറ്റീവായെങ്കിലും രോഗ ബാധയെതുടര്ന്നുണ്ടായ പ്രശ്നങ്ങള് ആരോഗ്യനില വഷളാക്കുകയായിരുന്നു.
