കോന്നി : ശബരിമല മണ്ഡലകാലത്ത് കോന്നിയിലെ ഗതാഗതകുരുക്ക് നിയന്ത്രിക്കുന്നതിന്റെ ഭാഗമായി 15 സ്പെഷ്യൽ പോലീസ് ഓഫീസർമാരെ നിയമിച്ചു. ശബരിമല മണ്ഡലകാലത്ത് കോന്നിയിൽ രൂക്ഷമാകുന്ന ഗതാഗത കുരുക്ക് ഒഴിവാക്കുന്നതിന്റെ ഭാഗമായി കോന്നി ട്രാഫിക് ജംഗ്ഷൻ, ചൈനമുക്ക്, എലിയറയ്ക്കൽ തുടങ്ങിയ പ്രാധാന സ്ഥലങ്ങളിൽ എല്ലായിടത്തും ഇവരുടെ സേവനം രാവും പകലും ലഭ്യമാകുന്ന രീതിയിൽ ആണ് ഡ്യൂട്ടി സമയം ക്രമീകരിച്ചിരിക്കുന്നത്. ശബരിമല മണ്ഡലകാലം ആരംഭിച്ചു കഴിഞ്ഞാൽ വലിയ തിരക്കാണ് കോന്നിയിൽ അനുഭവപ്പെടുന്നത്.
കോന്നി ട്രാഫിക് ജംഗ്ഷനിൽ സിഗ്നൽ സംവിധാനം ഇല്ലാത്തതിനാൽ ഈ തവണയും പോലീസും സ്പെഷ്യൽ പോലീസ് ഓഫീസർമാരും ചേർന്ന് ഗതാഗതകുരുക്ക് നിയന്ത്രിക്കേണ്ട അവസ്ഥയാകും ഉണ്ടാവുക. പുനലൂർ മൂവാറ്റുപുഴ സംസ്ഥാന പാതയുടെ നിർമ്മാണം പൂർത്തിയായിട്ടും കോന്നി സെൻട്രൽ ജംഗ്ഷനിൽ ട്രാഫിക് സിഗ്നൽ സ്ഥാപിക്കുവാനോ ക്യാമറകൾ സ്ഥാപിക്കുവാനോ കഴിഞ്ഞിട്ടില്ല. സംസ്ഥാന പാത തുറന്നു നൽകിയതിന് ശേഷമുള്ള രണ്ടാമത്തെ ശബരിമല തീർഥാടനകാലമാണിത്. കഴിഞ്ഞ മണ്ഡലകാലത്തും നിരവധി ശബരിമല അയ്യപ്പ ഭക്തരുടെ വാഹനങ്ങൾ സംസ്ഥാന പാതയിൽ അപകടത്തിൽപെട്ടിരുന്നു.
