കുവൈത്ത് സിറ്റി: കുവൈത്തിൽ നാല് വ്യത്യസ്ത കേസുകളിലായി വൻ മയക്കുമരുന്ന് വേട്ട. മയക്കുമരുന്ന് നിയന്ത്രണത്തിനായുള്ള ജനറൽ ഡിപ്പാർട്ട്മെന്റിന്റെ നേതൃത്വത്തിൽ ആറ് പ്രതികളെ അറസ്റ്റ് ചെയ്തു. ഏകദേശം 12.8 കിലോഗ്രാം മയക്കുമരുന്നുകളും ലഹരിവസ്തുക്കളും ഒരു തോക്കും പിടിച്ചെടുത്തതായും ആഭ്യന്തര മന്ത്രാലയം വ്യാഴാഴ്ച അറിയിച്ചു. രാജ്യവ്യാപകമായി നടക്കുന്ന സുരക്ഷാ ശ്രമങ്ങളുടെയും മയക്കുമരുന്ന് തടയുന്നതിനായി ക്രിമിനൽ സുരക്ഷാ വിഭാഗം നടത്തുന്ന ഊർജ്ജിത പ്രചാരണങ്ങളുടെയും ഭാഗമായാണ് ഈ നടപടികൾ എന്നും മന്ത്രാലയം പ്രസ്താവനയിൽ പറഞ്ഞു.
വിവിധ പ്രദേശങ്ങളിൽ നടത്തിയ ഈ ഓപ്പറേഷനുകളിൽ വലിയ അളവിലുള്ള മയക്കുമരുന്ന് ശേഖരങ്ങൾ പിടിച്ചെടുത്തു. അൽ-റായി പ്രദേശത്ത് ഒരു കുവൈത്തി പൗരനെയും ഒരു അനധികൃത താമസക്കാരനെയും അറസ്റ്റ് ചെയ്തു. ഇവരിൽ നിന്ന് ഏകദേശം 2.5 കിലോഗ്രാം കഞ്ചാവ്, ഒരു കിലോഗ്രാം സിന്തറ്റിക് ഡ്രഗ്സ്, ഒരു കൃത്യതാ സ്കെയിൽ, ഒരു തോക്ക് എന്നിവ പിടിച്ചെടുത്തു. ഖുർത്തുബയിൽ ഒരു ഏഷ്യൻ പൗരന്റെ അറസ്റ്റ് രേഖപ്പെടുത്തി. ഇയാളുടെ പക്കൽ നിന്ന് 1.5 കിലോഗ്രാം മെത്താംഫെറ്റാമൈൻ, 500 ഗ്രാം ഹെറോയിൻ എന്നിവ കണ്ടെത്തി. അൽ-ഷുഹദ, ഫുനൈറ്റീസ് പ്രദേശങ്ങളിൽ ഏകദേശം 3.5 കിലോഗ്രാം ഹാഷിഷ്, രണ്ട് ഗ്രാം കൊക്കെയ്ൻ, ഒരു ഗ്രാം ഷാബു, ഒരു കൃത്യതാ സ്കെയിൽ എന്നിവ കൈവശം വെച്ചതിന് രണ്ട് കുവൈത്തി പൗരന്മാരെ അറസ്റ്റ് ചെയ്തു.
