എറണാകുളം: കൊച്ചിയില് സിപിഒയെ ഭീഷണിപ്പെടുത്തി പണം തട്ടിയ കേസില് ഒളിവില് കഴിയുന്ന എസ്ഐയെ പിടികൂടുന്നതിനായി പ്രത്യേക അന്വേഷണ സംഘത്തെ നിയമിച്ചു. സ്പായിലെത്തിയ സിപിഒയെ ഭീഷണിപ്പെടുത്തി നാല് ലക്ഷം രൂപ തട്ടിയ കേസിലാണ് എസ്ഐ കെ. കെ. ബൈജു ഒളിവില് പോയത്. പാലാരിവട്ടം പോലീസ് സ്റ്റേഷനിലെ ഗ്രേഡ് എസ്ഐയാണ് കെ.കെ. ബൈജു. സംഭവത്തിന് പിന്നാലെ ഇയാളെ സസ്പെന്ഡ് ചെയ്തിരുന്നു. പാലാരിവട്ടം എസ്എച്ച്ഒ ആര് സനീഷിന്റെ നേതൃത്വത്തില് അഞ്ചംഗ സംഘത്തെയാണ് നിയമിച്ചത്. സ്പായില് പോയ വിവരം ഭാര്യയെ അറിയിക്കുമെന്ന് ഭീഷണിപ്പെടുത്തിയാണ് സിപിഒയുടെ കൈയ്യില് നിന്ന് നാല് ലക്ഷം രൂപ തട്ടിയെടുത്തത്. സംഭവത്തില് സ്പാ നടത്തുന്ന യുവതി അടക്കം മൂന്ന് പേരെയാണ് പ്രതി ചേര്ത്തത്.
നവംബര് എട്ടിനാണ് സിപിഒ സ്പായിലെത്തി മടങ്ങിയത്. പിന്നാലെ സ്പാ നടത്തുന്ന യുവതി പൊലീസുകാരനെ വിളിച്ച് തന്റെ മാല നഷ്ടമായെന്നും അത് പൊലീസുകാരന് എടുത്തുകൊണ്ടു പോയതാണെന്നും പറഞ്ഞു. തുടര്ന്ന് എസ് ഐ സിപിഒയെ വിളിച്ച് ഇക്കാര്യം ഭാര്യയോട് പറയുമെന്ന് ഭീഷണിപ്പെടുത്തി നാല് ലക്ഷം രൂപ തട്ടിയെടുത്തെന്നാണ് കേസ്. തട്ടിയെടുത്തതില് 2 ലക്ഷം ബൈജുവിന് ലഭിച്ചതായി പൊലീസ് കണ്ടെത്തി. എന്നാല് സംഭവം വിവാദമായതോടെ എസ് ഐ ഒളിവില് പോയെന്നാണ് വിവരം.
