തിരുവനന്തപുരം : ശ്രീനാരായണ ഗുരുവിന്റെ 167ാം ജന്മദിനം ഇന്ന്. കൊവിഡ് നിയന്ത്രണങ്ങളുടെ പശ്ചാത്തലത്തില് ഇത്തവണ സംസ്ഥാനത്ത് വിപുലമായ ആഘോഷങ്ങള് ഒഴിവാക്കിയിട്ടുണ്ട്. പതിവ് പ്രാര്ത്ഥനകളും പൂജകളും വര്ക്കല ശിവഗിരിയില് രാവിലെ നടക്കും. ശ്രീ നാരായണ ധര്മ്മസംഘം ട്രസ്റ്റ് പ്രസിഡന്റ് സ്വാമി വിശുദ്ധാനന്ദ പതാക ഉയര്ത്തും. ഗുരുവിന്റെ ജന്മഗൃഹമായ ചെമ്പഴന്തി ഗുരുകുലത്തില് രാവിലെ നടക്കുന്ന ജയന്തി സമ്മേളനം മുഖ്യമന്ത്രി പിണറായി വിജയന് ഉദ്ഘാടനം ചെയ്യും.
കൊടുങ്ങല്ലൂരില് ശ്രീ നാരായണ ഗുരുജയന്തി ആഘോഷങ്ങളുുടെ ഭാഗമായി 60 അടി വലുപ്പത്തില് ഒരു ടണ് പൂക്കളില് ശ്രീനാരായണഗുരുവിന്റെ ഛായാചിത്രം ഒരുക്കി വീണ്ടും ഡാവിഞ്ചി ചിത്ര വിസ്മയം. ഗുരുദേവ ജയന്തി ആഘോഷവുമായി ബന്ധപ്പെട്ട് എസ്.എന്.ഡി.പി യോഗം കൊടുങ്ങല്ലൂര് യൂണിയന് വേണ്ടിയാണ് ഡാവിഞ്ചി സുരേഷ് ഗുരുവിന്റെ വമ്പന് ബഹുവര്ണ ഛായാചിത്രം തീര്ത്തത്. ഗുരുഭക്തനായ കൊടുങ്ങല്ലൂര് കണ്ണകി ഫ്ലവേഴ്സ് ഉടമ ഗിരീഷാണ് രണ്ടുലക്ഷം രൂപ വിലമതിക്കുന്ന പൂക്കള് സംഭാവനയായി നല്കിയത്.
കൊടുങ്ങല്ലൂര് കാവില് കടവ് കായല് തീരത്തുള്ള കേബീസ് ദര്ബാര് കണ്വെന്ഷന് സെന്റര് ഉടമ നസീര് മൂന്നു ദിവസം ഇതിന് വേണ്ടി സൗജന്യമായി സ്ഥലം വിട്ടുനല്കി. ഒരുപാട് പേരുടെ കൂട്ടായ്മയിലാണ് ഗുരുവിന്റെ ഭീമാകാര ചിത്രം പിറവിയെടുത്തത്. നിരവധി മീഡിയങ്ങളില് ചിത്രങ്ങള് ഒരുക്കുന്ന ഡാവിഞ്ചി സുരേഷിന്റെ 73ാമത്തെ മീഡിയമാണ് പൂക്കള് കൊണ്ടുള്ള ഗുരുവിന്റെ ഛായാചിത്രം. ഓറഞ്ച് ചെണ്ടുമല്ലി, മഞ്ഞ ചെണ്ടുമല്ലി, മഞ്ഞ ജെമന്തി, വെള്ള ജെമന്തി, ചില്ലിറോസ്, അരളി, ചെത്തിപ്പൂ, വാടാമല്ലി എന്നീ പൂക്കളാണ് ഉപയോഗിച്ചത്.
എട്ടു മണിക്കൂറോളം ചെലവഴിച്ച് എട്ടുതരം പൂക്കള് കൊണ്ടാണ് ചിത്രമൊരുക്കിയത്. പൂക്കളമൊരുക്കാന് ഫെബി, ഷാഫി, ഇന്ദ്രജിത്ത്, ഇന്ദുലേഖ, ദേവി, മിഥുന്, റിയാസ് ദര്ബാര് എന്നിവര് സഹായത്തിനുണ്ടായിരുന്നു. കൊടുങ്ങല്ലൂര് യൂണിയന് സെക്രട്ടറി പി.കെ. രവീന്ദ്രന്, യോഗം കൗണ്സിലര് ബേബി റാം, വൈസ് പ്രസിഡന്റ് ജയലക്ഷ്മി, ഡയറക്ടര് ബോര്ഡ് അംഗങ്ങള്, യൂണിയന് കൗണ്സില് അംഗങ്ങള് എന്നിവര് നേതൃത്വം നല്കി.