തിരുവനന്തപുരം : സംസ്ഥാനത്ത് ശ്രീനാരായണ ഗുരുവിന്റെ പേരില് ഓപ്പണ് സര്വ്വകലാശാല ആരംഭിക്കുമെന്ന് മുഖ്യമന്ത്രി പിണറായി വിജയന്. ഒക്ടോബര് രണ്ടിന് ഗാന്ധി ജയന്തിയിലാണ് ഓപ്പണ് സര്വ്വകലാശാല നിലവില് വരികയെന്നും മുഖ്യമന്ത്രി പ്രഖ്യാപിച്ചു.
കേരളത്തിലെ പ്രാചീന തുറമുഖ നഗരവും തൊഴിലാളി കേന്ദ്രവുമായ കൊല്ലമായിരിക്കും സര്വ്വകലാശാലയുടെ ആസ്ഥാനം. നിലവിലെ നാല് സര്വ്വകലാശാലകളുടെ വിദൂര വിദ്യാഭ്യാസ പഠന സംവിധാനങ്ങള് സംയോജിപ്പിച്ചാണ് ഓപ്പണ് സര്വ്വകലാശാല ആരംഭിക്കുകയെന്നും മുഖ്യമന്ത്രി വാര്ത്താ സമ്മേളനത്തില് അറിയിച്ചു.
ഏത് പ്രായത്തിലുള്ളവര്ക്കും പഠിക്കാന് ഇതിലൂടെ അവസരമൊരുക്കും. കോഴ്സ് പൂര്ത്തിയാക്കാതെ ഇടയ്ക്ക് പഠനം നിര്ത്തുന്നവര്ക്ക് അതുവരെയുള്ള പഠനത്തിനനുസരിച്ച് ഡിപ്ലോമാ സര്ട്ടിഫിക്കറ്റ് നല്കാനും ഈ സര്വ്വകലാശാലയ്ക്ക് കഴിയും. ദേശീയ അന്തര്ദേശീയ രംഗത്തെ പ്രഗത്ഭരായ അധ്യാപകരുടെയും വിദഗ്ധരുടെയും ക്ലാസുകള് ഓപ്പണ് സര്വ്വകലാശാലയിലൂടെ കഴിയുമെന്നും മുഖ്യമന്ത്രി പറഞ്ഞു.
