ലേ: ഏറെ പ്രാധാന്യമുള്ള ശ്രീനഗര്‍-ലേ ഹൈവേ ഉടന്‍ തുറന്നേക്കും. 434 കിലോമീറ്റര്‍ നീളമുണ്ട് ഈ ഹൈവേയ്ക്ക്. ഈ തന്ത്രപ്രധാനമായ റോഡിലെ മഞ്ഞ് ഏറെക്കുറെ നീക്കിയിട്ടുണ്ട്. യാത്രക്കാര്‍ക്കായി ഈ ദേശീയപാത എത്രയും വേഗം തുറക്കുന്നതിനുള്ള പ്രവര്‍ത്തനങ്ങള്‍ പുരോഗമിക്കുകയാണ്.
ആസൂത്രണം ചെയ്തതനുസരിച്ച് കാര്യങ്ങള്‍ നടക്കുകയാണെങ്കില്‍ ഈ മാസം അവസാനത്തോടെ ദേശീയപാത ഗതാഗതത്തിനായി തുറക്കും. ഫെബ്രുവരി 14 ന് സോജിലയുടെ രണ്ട് അറ്റത്തും മഞ്ഞ് വൃത്തിയാക്കല്‍ പ്രവര്‍ത്തനങ്ങള്‍ ആരംഭിച്ചിരുന്നു. പ്രോജക്ട് വിജയക്, പ്രോജക്ട് ബീക്കണ്‍ അധികൃതര്‍ അറിയിച്ചു. റോഡിന്റെ സോജില പാസ്, സോനമാര്‍ഗ്, സീറോ പോയിന്റ്, മീന്‍മാര്‍ഗ് പ്രദേശങ്ങളില്‍ കനത്ത മഞ്ഞുവീഴ്ചയെത്തുടര്‍ന്ന് കഴിഞ്ഞ ഡിസംബറില്‍ ദേശീയപാത അടച്ചിരുന്നു.
കനത്ത മഞ്ഞുവീഴ്ചയെത്തുടര്‍ന്ന് ഡിസംബര്‍ 10 മുതല്‍ ലഡാക്ക് രാജ്യത്തിന്റെ മറ്റ് ഭാഗങ്ങളില്‍ നിന്ന് ഒറ്റപ്പെട്ടു. സോജിലാ ചുരം വഴിയുള്ള ഗതാഗതവും നിന്നു. ഇത് രാജ്യത്തെ നിയന്ത്രണ രേഖയുമായി (ലൈന്‍ ഓഫ് ആക്ച്വല്‍ കണ്‍ട്രോള്‍) ബന്ധിപ്പിക്കുന്ന തന്ത്രപരമായ ദേശീയപാതയാണ്.
നിലവില്‍ ടീമുകള്‍ മികച്ച പുരോഗതി കൈവരിച്ചതായും എന്‍എച്ച് -1 ലെ ഗതാഗതം ഈ വര്‍ഷം മാര്‍ച്ച് അവസാനത്തോടെ പുനസ്ഥാപിക്കുമെന്നും പ്രതീക്ഷിക്കുന്നതായി ഉദ്യോഗസ്ഥര്‍ അറിയിച്ചിട്ടുണ്ട്. ലഡാക്കിലെ 600 കിലോമീറ്ററിലധികം റോഡിന് സ്‌നോ ക്ലിയറന്‍സ് ഏറ്റെടുക്കാനാണ് പദ്ധതിയെന്ന് അധികൃതര്‍ അറിയിച്ചു. ഇത് നാട്ടുകാര്‍ക്കും സൈനികര്‍ക്കും വേണ്ടിയുള്ള ഉപാധിയാണ്. ഈ പ്രവര്‍ത്തനത്തിനിടയില്‍ ചില സ്ഥലങ്ങളില്‍ അവര്‍ ധാരാളം കാലാവസ്ഥാ വെല്ലുവിളികള്‍ നേരിട്ടിരുന്നു.
ചില ദിവസങ്ങളില്‍ താപനില മൈനസ് 15 ഡിഗ്രി മുതല്‍ 20 ഡിഗ്രി വരെ കുറഞ്ഞു. ഇതൊക്കെയാണെങ്കിലും ഹൈ-എന്‍ഡ് മെഷീനുകളുടെയും കട്ടറുകളുടെയും സഹായത്തോടെ ജോലിക്കാര്‍ പ്രവര്‍ത്തിച്ചു. റോഡ് തുറക്കുന്നതോടെ പ്രദേശവാസികള്‍ക്കും ടൂറിസ്റ്റുകള്‍ക്കും ഒരുപോലെ അത് അനുഗ്രഹമാകും. അതേസമയം നുബ്ര, സിന്ധു, ശ്യോക് താഴ്വരകളിലെ പ്രധാന റോഡുകള്‍ ഇതിനകം പൊതുജനങ്ങള്‍ക്കായി തുറന്നുകൊടുത്തിട്ടുണ്ട്.
