തിരുവനന്തപുരം : കേരളത്തിന്റെ പുതിയ മുഖ്യ തിരഞ്ഞെടുപ്പ് ഓഫീസറെ കണ്ടെത്താനുള്ള നടപടികൾ അവസാന ഘട്ടത്തിലേക്ക്. പുതിയ ഓഫീസറെ നിയമിക്കുന്നതിനായി നാല് മുതിർന്ന ഐഎഎസ് ഉദ്യോഗസ്ഥരുടെ പട്ടിക മുഖ്യമന്ത്രിയുടെ ഓഫീസ് കേന്ദ്ര തിരഞ്ഞെടുപ്പ് കമ്മീഷന് കൈമാറി. ഡോ. വീണ എൻ. മാധവൻ, ഡോ. കെ. വാസുകി, ടി.വി. അനുപമ, ഡോ. എ. കൗശികൻ എന്നിവരാണ് പട്ടികയിൽ ഉള്ളത്. ഈ പട്ടികയിൽ ഉൾപ്പെട്ട നാല് പേരിൽ മൂന്ന് പേരും വനിതകളാണ് എന്നതാണ് ഏറ്റവും ശ്രദ്ധേയമായ കാര്യം.
2008, 2009, 2010 ഐഎഎസ് ബാച്ചുകളിൽപ്പെട്ടവരാണ് ഇവർ. വിവിധ ജില്ലകളിൽ കളക്ടർമാരായും വിവിധ സർക്കാർ വകുപ്പുകളുടെ തലപ്പത്തും പ്രവർത്തിച്ച് മികച്ച പ്രവർത്തന പരിചയമുള്ള ഉദ്യോഗസ്ഥരെയാണ് സ്ഥാനത്തേക്ക് പരിഗണിക്കുന്നത്. നിലവിലെ മുഖ്യ തിരഞ്ഞെടുപ്പ് ഓഫീസറായിരുന്ന രത്തൻ യു. ഖേൽക്കർ മുഖ്യമന്ത്രിയുടെ പ്രിൻസിപ്പൽ സെക്രട്ടറിയായി സ്ഥാനമേറ്റതിനെ തുടർന്നാണ് പുതിയ നിയമനം ആവശ്യമായി വന്നത്. ഖേൽക്കർ സ്ഥാനമൊഴിഞ്ഞ സാഹചര്യത്തിൽ എത്രയും വേഗം പുതിയ നിയമനം ഉണ്ടാകുമെന്നാണ് റിപ്പോർട്ടുകൾ.
