നിലമ്പൂര്: സ്വകാര്യ ബസുടമകളുടെ പേരില് അമിത പിഴ ചുമത്തുന്ന ഗതാഗത വകുപ്പിന്റെ നടപടി തുടരുകയാണെങ്കില് സര്വീസ് നിര്ത്തിവെച്ച് പെര്മിറ്റുകള് സറണ്ടര് ചെയ്യാന് നിര്ബന്ധിതമാകുമെന്ന് ബസ് ഓപറേറ്റേഴ്സ് ഫെഡറേഷന് സംസ്ഥാന വൈസ് പ്രസിഡന്റ് ശരണ്യ മനോജ് കുമാര്. ബസ് ഓപറേറ്റേഴ്സ് അസോസിയേഷന് നിലമ്പൂര് താലൂക്ക് സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. അറ്റകുറ്റപ്പണികള്ക്കുവേണ്ടിയും മറ്റും നിര്ത്തിയിടുന്ന ബസുകളുടെ ഫോട്ടോയെടുത്ത് പെര്മിറ്റ് വയലേഷന് പിഴ ചുമത്തുന്ന നടപടി അംഗീകരിക്കാന് കഴിയില്ല. ബസ് നിരക്ക് വര്ധിപ്പിച്ചെങ്കിലും സ്വകാര്യ ബസുകളിലെ യാത്രക്കാരില് 50 ശതമാനത്തിലധികം വരുന്ന വിദ്യാര്ഥികളുടെ ടിക്കറ്റ് നിരക്കില് വര്ധന വരുത്തിയിരുന്നില്ല.
ഇക്കാര്യത്തില് കമ്മീഷനെ നിയമിച്ച് ഒരുമാസത്തിനകം റിപ്പോര്ട്ട് വാങ്ങിയശേഷം നിരക്ക് വര്ധന നടപ്പാക്കാമെന്ന് സര്ക്കാര് ബസ് ഓപറേറ്റേഴ്സ് ഫെഡറേഷന് ഉറപ്പ് നല്കിയെങ്കിലും ഒന്നും നടപ്പായില്ല. ബസ് വ്യവസായത്തെ തകര്ക്കുന്ന ഇത്തരം നടപടികള് ഇനിയും തുടരുകയാണെങ്കില് സര്വീസ് നിര്ത്തിവെക്കാന് നിര്ബന്ധിതമാകുമെന്ന് താലൂക്ക് സമ്മേളനം പ്രമേയത്തിലൂടെ സര്ക്കാറിനെ അറിയിച്ചു. താലൂക്ക് പ്രസിഡന്റ് മുഹമ്മദലി നവനീത അധ്യക്ഷത വഹിച്ചു. സംസ്ഥാന ട്രഷറര് ഹംസ ഏരിക്കുന്നന് മുഖ്യപ്രഭാഷണം നടത്തി. സംസ്ഥാന ജോയന്റ് സെക്രട്ടറി രാജശേഖരന്, ജില്ല പ്രസിഡന്റ് ബ്രൈറ്റ് നാണി ഹാജി, വിവിധ താലൂക്ക് ഭാരവാഹികളായ അനില് നിലമ്പൂര്, മുനീര് വണ്ടൂര്, എന്.കെ. ശിശുപാലന്, വെട്ടത്തൂര് മുഹമ്മദലി ഹാജി, റഫീഖ് പടിക്കല്, മൈ ബ്രദര് മജീദ്, കുഞ്ഞിമൊയ്തീന് തോട്ടത്തില്, റസാഖ് ഏഞ്ചല് ബേബി, സുധീര് ബാബു എന്നിവര് സംസാരിച്ചു.