റാന്നി: പെരുനാട്ടില് വീണ്ടും പേപ്പട്ടി ആക്രമണം. പെരുനാട് മാര്ക്കറ്റില് തെരുവുനായ നിരവധി പേരെ ആക്രമിച്ചു. അത്തിക്കയം, പെരുനാട് മാര്ക്കറ്റ് എന്നിവിടങ്ങളില് ലോട്ടറി വില്പ്പന നടത്തുന്ന പെരുനാട് സ്വദേശി ഉഷ എന്നയാളെയാണ് ആദ്യം ആക്രമിച്ചത്. നായയുടെ കടിയേറ്റവരെ പെരുനാട് ആശുപത്രിയില് പ്രഥമശുശ്രൂഷ നടത്തിയ ശേഷം പത്തനംതിട്ട ജനറല് ആശുപത്രിയിലേക്ക് മാറ്റി. മടത്തുംമൂഴിയിലും അത്തിക്കയം റോഡിലേക്കും കടന്ന നായ ഇരുചക്ര വാഹന യാത്രക്കാരേയും, കാല്നട യാത്രക്കാരേയുമാണ് ആക്രമിച്ചത്.
പേവിഷബാധയുള്ള നായ ആണെന്നാണ് നാട്ടുകാര് പറയുന്നത്. നായയുടെ ആക്രമണം ചെറുക്കുന്നതിനിടെ അടിയേറ്റ നായ ചത്തു. സ്ഥലത്ത് പഞ്ചായത്ത് അധികൃതരോ ആരോഗ്യ പ്രവര്ത്തകരോ തിരിഞ്ഞ് നോക്കിയിട്ടില്ലെന്ന് ആരോപണം ഉണ്ട്. കഴിഞ്ഞ ദിവസം കന്നുകാലികളേയും ഈ നായ ആക്രമിച്ചതായി പറയുന്നു. മുന്പ് പേപ്പട്ടി ആക്രമണത്തില് ഒരു കുട്ടി മരണമടഞ്ഞ സംഭവം പെരുനാട്ടില് ഉണ്ടായിട്ടുണ്ട്.
