തിരുവനന്തപുരം: തെരുവുനായ കുറുകെ ചാടിയതിനെ തുടർന്നുണ്ടായ അപകടത്തിൽ പരുക്കേറ്റ യുവാവ് മരിച്ചു. തിരുവനന്തപുരം കുന്നത്തുകാൽ സ്വദേശി എൻ.എസ്.അജിൻ(25)ആണു മരിച്ചത്. കൂലിപ്പണിക്കാരനായിരുന്നു. അരുവിയോട് ജംഗ്ഷനിൽ വെള്ളിയാഴ്ച വൈകിട്ട് ആറരയോടെയായിരുന്നു സംഭവം. തെരുവുനായ കുറുകെ ചാടിയതിനെ തുടർന്ന് നിയന്ത്രണം നഷ്ടപ്പെട്ട ഇരുചക്രവാഹനം എതിരെ വരികയായിരുന്ന അജിന്റെ ബൈക്കിലിടിക്കുകയായിരുന്നു.
തലയ്ക്കു ഗുരുതര പരുക്കേറ്റ അജിനെ കാരക്കോണം ആശുപത്രിയിൽ പ്രവേശിപ്പിച്ചെങ്കിലും ഇന്നു രാവിലെ മരിച്ചു. മീൻ വാങ്ങിയ ശേഷം വീട്ടിലേക്കു മടങ്ങുകയായിരുന്നു അജിൻ. അതിനിടെ തിരുവനന്തപുരം നഗരമധ്യത്തില്‍ സ്കൂട്ടര്‍ യാത്രക്കാരനെ ഇന്നലെ തെരുവുനായ ആക്രമിച്ചു. ഇരുചക്രവാഹനത്തിൽ സഞ്ചരിക്കുകയായിരുന്ന മന്നം മെമ്മോറിയൽ നാഷനൽ ക്ലബ് ജീവനക്കാരൻ ശ്രീനിവാസനെ തെരുവുനായ്ക്കൾ ഇന്നലെ രാത്രി സംഘം ചേർന്ന് ആക്രമിച്ചു. മെഡിക്കൽ കോളജിൽ പ്രവേശിപ്പിച്ച ശ്രീനിവാസന്റെ നില ഗുരുതരമെന്നു ആശുപത്രി അധികൃതർ.
