തൃശൂർ : തൃശൂർ ചൂണ്ടല് ഗവണ്മെന്റ് യുപി സ്കൂളിനാണ് തെരുവ് നായയുടെ ശല്യം അതിരൂക്ഷമായ സാഹചര്യത്തിൽ അധികൃതർ അവധി നൽകിയിരിക്കുന്നത്. സ്കൂളിനോട് ചേര്ന്നുള്ള മിനി ഓഡിറ്റോറിയത്തിലെ മുറിയില് തെരുവുനായ പ്രസവിച്ച് കിടക്കുകയാണ്. 4 കുഞ്ഞുങ്ങളുമുണ്ട്. മാത്രമല്ല സ്കൂൾ പരിസരത്തെല്ലാം തെരുവുനായ്ക്കളുടെ ശല്യമുണ്ട്. ഇത് വിദ്യാർത്ഥികളെയും അധ്യാപകരെയുമെല്ലാം ബുദ്ധിമുട്ടിലാക്കിയിരിക്കുകയാണ്. കഴിഞ്ഞ ദിവസം സ്കൂളിലേക്ക് വരികയായിരുന്ന വിദ്യാർത്ഥിയെ നായ കടിച്ചിരുന്നു. പിന്നീട് നായയെ ചത്ത നിലയിൽ കണ്ടെത്തുകയും തുടർന്ന് നടത്തിയ പരിശോധനയിൽ പേവിഷബാധ സ്ഥിരീകരിക്കുകയും ചെയ്തിരുന്നു. അത്തരത്തില് സ്കൂളിന് ചുറ്റും തെരുവുനായകളെക്കൊണ്ടുള്ള ശല്യമാണ്. നിലവില് വിദ്യാർത്ഥികള്ക്കും അധ്യാപകര്ക്കും സ്കൂളിലേക്ക് ഭയമില്ലാതെ വരാന് കഴിയാത്ത സ്ഥിതിയാണ്. പിന്നാലെയാണ് അവധി നൽകിയത്.
തെരുവുനായ ശല്യം കൂടിയതോടെ വിഷയത്തിൽ സ്കൂള് അധികൃതരും പ്രദേശവാസികളും പഞ്ചായത്ത് പ്രസിഡനത്തിന് പരാതി നൽകിയിരുന്നു. പരാതിയുടെ അടിസ്ഥാനത്തിൽ സ്ഥലത്തെത്തി പരിശോധന നടത്തിയ പ്രസിഡന്റ് നായ്ക്കളെ ഇവിടെ നിന്നും മറ്റൊരിടത്തേക്ക് മാറ്റാനുള്ള കാര്യം ആലോചിക്കുമെന്നാണ് അറിയിച്ചിരിക്കുന്നത്.
