കോഴിക്കോട് : റെയില്വേ സ്റ്റേഷനില് നിര്ത്തിയിട്ട ഗുഡ്സ് ട്രെയിനിന് മുകളില് കയറി വൈദ്യുതി കമ്പിയില് പിടിച്ച വിദ്യാര്ത്ഥിക്ക് ഗുരുതരമായി പൊള്ളലേറ്റു. കോഴിക്കോട് തിക്കോടി റെയില്വേ സ്റ്റേഷനിലാണ് ദാരുണ സംഭവം നടന്നത്. പയ്യോളി അയനിക്കാട് വെസ്റ്റ് യുപി സ്കൂളിന് സമീപം താമസിക്കുന്ന മുഹമ്മദ് സിനാന് (17) എന്ന വിദ്യാര്ത്ഥിയാണ് അപകടത്തില്പ്പെട്ടത് എന്നാണ് ലഭിക്കുന്ന വിവരം. ഇന്ന് പുലര്ച്ചെയോടെയാണ് സംഭവം നടന്നത്. തിക്കോടി റെയില്വേ സ്റ്റേഷനില് നിര്ത്തിയിട്ടിരുന്ന ഗുഡ്സ് ട്രെയിനിന് മുകളില് വിദ്യാര്ത്ഥി കയറുകയായിരുന്നു. കാല് തെന്നി താഴെ വീഴുന്നതിനിടെ അബദ്ധത്തില് വൈദ്യുതി കമ്പിയില് പിടിച്ചുപോയതാകാം എന്നാണ് കരുതുന്നത്.
കൂടെയുണ്ടായിരുന്ന സുഹൃത്തിന്റെ നിലവിളി കേട്ടെത്തിയ യാത്രക്കാരും റെയില്വേ ജീവനക്കാരും ഉടന് തന്നെ വിദ്യാര്ത്ഥിയെ സമീപത്തെ കൊയിലാണ്ടി താലൂക്ക് ആശുപത്രിയില് പ്രവേശിപ്പിച്ചു. 90 ശതമാനത്തോളം പൊള്ളലേറ്റ് ഗുരുതരാവസ്ഥയിലായ കുട്ടിയെ പിന്നീട് കോഴിക്കോട് മെഡിക്കല് കോളേജ് ആശുപത്രിയില് പ്രവേശിപ്പിക്കുകയായിരുന്നു.
