പത്തനംതിട്ട: നഗരത്തില് തെരുവ് നായ ആക്രമണം. 20 പേര്ക്കാണ് തെരുവു നായയുടെ കടിയേറ്റത്. പരിക്കേറ്റവരെ ജനറല് ആശുപത്രിയില് പ്രവേശിപ്പിച്ചു. ദിവസങ്ങളായി നഗരത്തില് തെരുവ് നായ ശല്യം രൂക്ഷമാണെന്ന് ജനങ്ങള് പരാതിപ്പെട്ടിരുന്നു. വിദ്യാര്ഥികളും വൃദ്ധരും ഉള്പ്പടെയുള്ളവര്ക്ക് കടിയേറ്റു. നഗരത്തിന്റെ പല പ്രദേശങ്ങളിലൂടെ ഓടി നടന്നാണ് തെരുവ് നായ ആക്രമണം നടത്തിയത്. എല്ലാവരെയും കടിച്ചത് ഒരു നായ തന്നെയാണെന്ന് ആക്രമണത്തിനിരയായവര് പറഞ്ഞു. നായയെ പിന്നീട് നാട്ടുകാര് അടിച്ചുകൊന്നു.
നഗരത്തില് എവിടെ നോക്കിയാലും നായ്ക്കളുടെ കൂട്ടമാണ്. പ്രഭാത സവാരിക്കിറങ്ങുന്നവര് കയ്യില് വടിയുമായി നടക്കുന്ന കാഴ്ച നിത്യവും കാണാം. നഗര ഹൃദയത്തില് പ്രവര്ത്തിക്കുന്ന ചന്തയും അറവുശാലയും നായ്ക്കളെ ആകര്ഷിക്കുകയാണ്. റിംഗ് റോഡില് പല സ്ഥലത്തും മാലിന്യങ്ങള് തള്ളുന്നുണ്ട്. അതുകൊണ്ടുതന്നെ റിംഗ് റോഡിലാണ് നായ ശല്യം രൂക്ഷം. നഗരസഭയുടെ ഭാഗത്തുനിന്നും ഫലപ്രദമായ നടപടികള് ഉണ്ടാകണമെന്നാണ് നഗരവാസികളുടെ ആവശ്യം.