കോഴിക്കോട്: റഷ്യന്‍ യുവതി ആത്മഹത്യാശ്രമം നടത്തിയ കേസില്‍ സുഹൃത്തിനെ കൂരാച്ചുണ്ട് പോലീസ് അറസ്റ്റ് ചെയ്തു. കാളങ്ങാലി ഓലക്കുന്നത്ത് ആഖില്‍ (28) ആണ് അറസ്റ്റിലായത്. യുവാവിനെതിരെ പോലീസ് നേരത്തെ കേസെടുത്തിരുന്നു. കൂരാച്ചുണ്ട് പോലീസാണ് കേസെടുത്തത്. ലൈംഗിക പീഡനം, അന്യായമായി തടവില്‍ പാര്‍പ്പിക്കല്‍, മര്‍ദ്ദനം തുടങ്ങിയ വകുപ്പുകള്‍ ചുമത്തിയാണ് കേസെടുത്തിരിക്കുന്നത്. സാമൂഹിക മാധ്യമത്തിലൂടെ പരിചയപ്പെട്ട മലയാളി യുവാവിനെ തേടി മൂന്നുമാസം മുമ്പാണ് റഷ്യന്‍ യുവതി കൂരാച്ചുണ്ടിലെത്തിയത്.
ആഖിലിന്റെ ശാരീരികവും മാനസികവുമായുള്ള പീഡനത്തെ തുടര്‍ന്നാണ് ആത്മഹത്യക്ക് ശ്രമിച്ചതെന്ന് യുവതി പോലീസിനോട് പറഞ്ഞു. ദേഹത്ത് ആഖില്‍ ഉപദ്രവിച്ചതിന്റെ പാടുകളും ഉണ്ടായിരുന്നു. ലഹരിക്ക് അടിമയായ യുവാവ് യുവതിയെ നിരന്തരം പീഡിപ്പിക്കുകയായിരുന്നു. യുവാവിന്റെ അക്രമം ഭയന്ന് മാതാപിതാക്കള്‍ വീട് മാറിയിരിക്കുകയാണ്.
