ചെന്നൈ : പ്രധാനമന്ത്രി നരേന്ദ്ര മോദിക്ക് ഉദ്ദേശ്യശുദ്ധിയില് തുളുമ്പുന്ന കുബുദ്ധിയാണെന്ന് മുന് എം പി സുരേഷ് ഗോപി. ചെന്നൈയിലെ മലയാളി ക്ലബ്ബില് ബി ജെ പി തമിഴ്നാട് ഘടകത്തിന്റെ ഇതരഭാഷാസെല് സംഘടിപ്പിച്ച ഓണാഘോഷ പരിപാടിയില് സംസാരിക്കവേയായിരുന്നു സുരേഷ് ഗോപിയുടെ പരാമര്ശം.
ഉദ്ദേശ്യശുദ്ധിയില് തുളുമ്പുന്ന കുബുദ്ധിയിലൂടെയാണ് പ്രധാനമന്ത്രി നരേന്ദ്രമോദി ഇന്ത്യയെ പുരോഗതിയിലേക്ക് നയിച്ചത്. രാഷ്ട്രീയത്തിലുപരി ഭരണപരമായ മിടുക്കുകാരണമാണ് അദ്ദേഹത്തെ ജനങ്ങള് ഹൃദയത്തിലേറ്റിയത്. ജന്ധന് അക്കൗണ്ട് പോലുള്ള പല പദ്ധതികളും നടപ്പാക്കി അദ്ദേഹം ജനങ്ങളുടെ കൂടെ നിന്നു. തുടക്കത്തില് ദോഷകരമാണെന്ന് തോന്നിപ്പിക്കുമെങ്കിലും പ്രധാനമന്ത്രി വിഭാവനംചെയ്ത പലപദ്ധതികളും ദീര്ഘവീക്ഷണത്തോടെയുള്ളതായിരുന്നു. അത് കാലം തെളിയിക്കുമെന്നും സുരേഷ് ഗോപി വ്യക്തമാക്കി.
