വടക്കാഞ്ചേരി : ആറ്റൂരിൽ നടന്ന സി.ബി.എസ്.ഇ. ജില്ലാ കലോത്സവത്തിൽ മോണോ ആക്ടിൽ ഒന്നാംസ്ഥാനം ലഭിച്ചത് പോട്ടോർ ഭാരതീയ വിദ്യാഭവനിലെ സൂര്യനന്ദയ്ക്ക്. വിജയത്തിന്പിന്നില് സൂര്യനന്ദ നന്ദിപറയുന്നത് സ്പെഷ്യൽ ബ്രാഞ്ച് അസി. സബ് ഇൻസ്പെക്ടർ വിനോദ് മുളങ്കുന്നത്തുകാവിനോടാണ്.
മോണോ ആക്ട് മത്സരത്തിൽ പങ്കെടുക്കണമെന്നത് സൂര്യനന്ദയ്ക്ക് മാത്രമല്ല അമ്മ സരിതയ്ക്കും വലിയ മോഹമായിരുന്നു. അച്ഛന്റെ മരണശേഷം സൂര്യനന്ദയുടെയും അനുജന്റെയും പഠനമുൾപ്പെടെ എല്ലാ കാര്യങ്ങളും അമ്മയുടെ ചുമലിലാണ്. അതിനിടെ മത്സരത്തിനുള്ള ചെലവുകൾകൂടി താങ്ങാൻ ഇവർക്കാകുമായിരുന്നില്ല. ഇതിനിടെ നാടകപ്രവർത്തകൻകൂടിയായ വിനോദ് കുട്ടിയെ സൗജന്യമായി മോണോ ആക്ട് പഠിപ്പിക്കാൻ മുന്നോട്ടുവന്നു. ഔദ്യോഗിക തിരക്കുകൾക്കിടെയായിരുന്നു ഇത്. നരബലിയുമായി ബന്ധപ്പെട്ട പ്രമേയമായിരുന്നു സൂര്യനന്ദയെ പഠിപ്പിച്ചത്.
രചനയും സംവിധാനവും നിർവഹിച്ച് സൂര്യനന്ദയെ ഒരുക്കിയ വിനോദ് സുഹൃത്ത് സന്തോഷ് വീരത്തിന്റെ സഹായത്തോടെ രണ്ട് ഗാനങ്ങൾകൂടി പരിശീലിപ്പിച്ചാണ് കലോത്സവവേദിയിലെത്തിച്ചത്. മോഹം സഫലമാക്കിയതോടൊപ്പം ഒന്നാംസമ്മാനത്തിന് അർഹയാക്കിയതിലുമുള്ള ആഹ്ലാദവുമായി നന്ദിപറയാനെത്തിയ സൂര്യനന്ദയെ മധുരം നൽകി വിനോദ് സ്വീകരിച്ചു. സംസ്ഥാന സ്കൂൾ യുവജനോത്സവത്തിലും വിനോദിന്റെ ശിഷ്യർ നാടകത്തിൽ ഒട്ടേറെത്തവണ കിരീടം നേടിയിട്ടുണ്ട്.