തിരുവനന്തപുരം : നിർമ്മാണ തൊഴിലാളികളോടുള്ള അവഗണന സർക്കാർ അവസാനിപ്പിക്കണമെന്ന് കേരള സ്റ്റേറ്റ് കെട്ടിട നിർമ്മാണ തൊഴിലാളി കോൺഗ്രസ് സംസ്ഥാന പ്രസിഡൻ്റ് അഡ്വ.റ്റി. ശരത്ചന്ദ്ര പ്രസാദ് ആവശ്യപ്പെട്ടു. സംസ്ഥാന ഭാരവാഹികളുടെയും ജില്ലാ പ്രസിഡൻ്റുമാരുടെയും യോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. പ്രതിമാസം 100 രൂപ വീതം പെൻഷൻ വർദ്ധിപ്പിക്കും എന്ന് പറഞ്ഞുകൊണ്ട് അധികാരത്തിൽ വന്ന എൽ ഡി ഫ് ഗവൺമെൻറ് തൊഴിലാളികൾക്ക് നിലവിൽ ലഭിച്ചുകൊണ്ടിരിക്കുന്ന പെൻഷൻ പോലും മാസങ്ങളായി നൽകുന്നില്ല. തൊഴിലാളികൾക്ക് പെൻഷനും മറ്റാനുകൂല്യങ്ങളുമായി നൽകേണ്ട ഫണ്ടിൽ നിന്നും സർക്കാർ കടമെടുത്ത കോടിക്കണക്കിന് രൂപ തിരിച്ചു നൽകി ഈ പ്രശ്നത്തിന് പരിഹാരം കാണണമെന്നും ശരത് ചന്ദ്രപ്രസാദ് ആവശ്യപ്പെട്ടു.
യുഡിഎഫിന്റെ ഭരണകാലത്ത് പെൻഷന് അപേക്ഷിച്ചാൽ മൂന്നുമാസത്തിനകം പെൻഷൻ ലഭിക്കുമായിരുന്നു എന്നാൽ ഇന്ന് അപേക്ഷ നൽകി പതിനെട്ട് മാസം കഴിഞ്ഞാൽ പോലും പെൻഷൻ ലഭിക്കുന്നില്ല. അനാസ്ഥയും കെടുകാര്യസ്ഥതയും മൂലം നിർമ്മാണ തൊഴിലാളി ക്ഷേമനിധി ബോർഡ് അടച്ചുപൂട്ടലിൻ്റെ വക്കിലാണെന്നും അദ്ദേഹം ആരോപിച്ചു. യോഗത്തിൽ സംസ്ഥാന ഭാരവാഹികളായ അഡ്വ. ഇ നാരായണൻ നായർ, കെ വി ലോറൻസ്, വാമനപുരം സാബു , ടി പി പ്രസാദ് , ഭുവനേന്ദ്രൻ നായർ, പത്മാലയം മിനിലാൽ, ജോസഫ് വയനാട്, ദേവദാസ് ആലപ്പുഴ, ധർമ്മരാജ് കോഴിക്കോട്, എം കെ ബാബു പാലക്കാട്, നഹാസ് പത്തനംതിട്ട, ഒ ബി രാജേഷ് കൊല്ലം,ജിതിൻ പോൾ ജെ ബ്രദേഴ്സ് തുടങ്ങിയവർ സംസാരിച്ചു.