പത്തനംതിട്ട : അണ്ടര്‍ 19 നാഷണല്‍ വിമന്‍സ് ക്രിക്കറ്റില്‍ തിരുവല്ല സ്വദേശിനിക്ക് സെലക്ഷന്‍. തിരുവല്ല വള്ളംകുളം കാരുവള്ളി മണ്ണും പുറത്തു വീട്ടില്‍ എം.കെ സുകുവിന്റെയും ബിന്ദുവിന്റെയും മകള്‍ സൂര്യ സുകുമാറിനാണ് സെലക്ഷന്‍ കിട്ടിയത്. കേരളത്തില്‍ നിന്നും സെലക്ഷന്‍ കിട്ടിയ രണ്ടുപേരില്‍ ഒരാളാണ് തിരുവല്ല സ്വദേശിനി സൂര്യ. സഹോദരന്‍ സൂരജ് സംസ്ഥാന ഫുട്ബോള്‍ സ്‌കൂള്‍ ടീം അംഗമാണ്. വീടിന് സമീപം ചെറുപ്രായത്തില്‍ സഹോദരനുമായി ക്രിക്കറ്റ് കളിച്ചാണ് ക്രിക്കറ്റിനോട് ഇഷ്ടം കൂടിയത്. കൂലിപ്പണിക്കാരനായ അച്ഛന്‍ രണ്ടുമക്കളെയും പഠിപ്പിച്ചുവെങ്കിലും രണ്ടു മക്കള്‍ക്കും സ്‌പോര്‍ട്‌സില്‍ തന്നെയായിരുന്നു കമ്പം. വിശാഖപട്ടണത്ത് ആയിരുന്നു ക്യാമ്പ് സെലക്ഷന്‍ നടന്നത്.
പഠനകാലത്തുതന്നെ ഓള്‍റൗണ്ടര്‍ ആയിരുന്നു. രണ്ടുതവണ ക്യാപ്റ്റനായി ഒരുതവണ വൈസ് ക്യാപ്റ്റനായി ആറു മത്സരം കേരളത്തിനുവേണ്ടിയും കളിച്ചു. പ്രശംസ നേടാന്‍ ആഗ്രഹിക്കാത്ത സൂര്യ ഇന്ത്യക്കുവേണ്ടി കളിക്കുകയാണ് തന്റെ ലക്ഷ്യമെന്ന് പറയുന്നു. അതിനു വേണ്ടി ഏതറ്റം വരെയും പോകും. കൂലിപ്പണിക്കാരായ മാതാപിതാക്കളുടെ തുച്ഛമായ വരുമാനം കൊണ്ട് ക്രിക്കറ്റ് കിറ്റ് വാങ്ങാന്‍ പോലും കഴിയാതിരുന്ന അവസ്ഥയില്‍ നിന്ന് സ്വന്തം ഇച്ഛാശക്തികൊണ്ട് ആണ് സൂര്യ പട്ടിണിയെയും പരാധീനതകളെയും മറികടന്ന് നാഷണല്‍ ക്യാമ്പിലേയ്ക്ക് എത്തുന്നത്.
