കാസർകോട് : കൈക്കൂലി വാങ്ങുന്നതിനിടെ വിജിലൻസ് അറസ്റ്റ് ചെയ്ത ചെങ്കള കൃഷി ഓഫീസർ എറണാകുളം കുമ്പളം സ്വദേശി പി.ടി അജിയുടെ യോഗ്യതയിലും ദുരൂഹത. കൃഷി ഓഫീസറായി സ്ഥാനക്കയറ്റം ലഭിക്കുന്നതിന് ഹാജരാക്കിയ ബിരുദസർട്ടിഫിക്കറ്റിന്റെ ആധികാരികത സംബന്ധിച്ച് അജിക്കെതിരേ പ്രത്യേക വിജിലൻസ് സെല്ലിന്റെ അന്വേഷണം നടന്നിരുന്നു.
ആഗ്രയിലെ ഭീംറാവു അംബേദ്കർ സർവകലാശാലയുടെ ബി.എസ്സി അഗ്രിക്കൾച്ചർ റഗുലർ സർട്ടിഫിക്കറ്റാണ് അജി സ്ഥാനക്കയറ്റത്തിനായി ഹാജരാക്കിയത്. എന്നാൽ ഇയാളുടെ സർവീസ് ബുക്ക് പരിശോധിച്ചതിൽ ഇക്കാലയളവിൽ പഠനം പൂർത്തീകരിച്ചതിന്റെയോ പഠനത്തിന് ആവശ്യമായ അവധിയെടുത്തതിന്റെയോ വിവരങ്ങളുണ്ടായിരുന്നില്ല. ഇതേത്തുടർന്ന് സർക്കാർ പ്രത്യേക വിജിലൻസ് സെല്ലിനെക്കൊണ്ട് അന്വേഷിപ്പിക്കുകയായിരുന്നു.
