റാന്നി : കൊറ്റനാട് ഗ്രാമ പഞ്ചായത്തു പ്രസിഡന്റായി സി.പി.ഐ യിലെ പ്രകാശ് പി.സാം തെരഞ്ഞെടുക്കപ്പെട്ടു. നാലിനെതിരെ ഏഴ് വോട്ടിനാണ് പ്രകാശ് വിജയിച്ചത്. എല്.ഡി.എഫിനു വേണ്ടി പ്രകാശ് പി.സാമും ബി.ജെ.പിക്കു വേണ്ടി എ.ജി സനല്കുമാറുമാണ് മത്സരിച്ചത്. പ്രസിഡന്റ് സ്ഥാനത്തേക്ക് പ്രകാശിന്റെ പേര് തങ്കമ്മ ജോര്ജ്
നിര്ദേശിക്കുകയും ബിനോജ് പിന്താങ്ങുകയും ചെയ്തു. സനല്കുമാറിനെ രാജേഷ് നിര്ദേശിക്കുകയും വി.വി ബിജിത പിന്താങ്ങുകയും ചെയ്തു. ഇന്നു രാവിലെ 11.30 ന് പഞ്ചായത്ത് കോൺഫറൻസ് ഹാളിലാണ് തെരഞ്ഞെടുപ്പ് നടന്നത്. പ്രസിഡന്റായിരുന്ന സിപിഐയിലെ മനോജ് ചരളേൽ ദേവസ്വം ബോർഡ് മെമ്പറായതിനെ തുടർന്ന് പ്രസിഡന്റ് സ്ഥാനം രാജിവെച്ചിരുന്നു. ഇതിനെ തുടർന്നാണ് പഞ്ചായത്തിൽ പ്രസിഡന്റ് തെരഞ്ഞെടുപ്പ് നടന്നത്.
ആരോഗ്യ വിദ്യാഭ്യാസ സ്റ്റാൻഡിങ് കമ്മറ്റി ചെയർമാനായിരുന്ന പ്രകാശ് പി സാം സി.പി.ഐ റാന്നി മണ്ഡലം കമ്മറ്റിയംഗവും മുന് കൊറ്റനാട് ലോക്കല് സെക്രട്ടറിയുമായിരുന്നു. 13 അംഗ പഞ്ചായത്തിൽ നിലവില് എല്.ഡി.എഫിന് ഏഴും ബി.ജെ.പിക്ക് നാലും കോൺഗ്രസിന് ഒന്നുമാണ് കക്ഷിനില. എട്ടംഗങ്ങളായിരുന്ന എല്.ഡി.എഫില് നിന്നും ഒരംഗം രാജി വെച്ചതോടെയാണ് അംഗബലം ഏഴായി കുറഞ്ഞത്. മല്ലപ്പള്ളി സഹകരണ സംഘം അസിസ്റ്റന്റ് രജിസ്ട്രാര് (ജനറല്) പി.ആര് അഭിലാഷ് ആയിരുന്നു വരണാധികാരി.
